Sagaing Division, Kalewa khuapi ah November 9, 2023 nitak lamin PDF leh SAC pawl kikap uh a, PDF lamte 10 val si-in, galvan tampi tanlawh lai cih kiza hi. Kalaymyo pan galkuan a pai SACte galkap 70 kim tawh zanni nitak lam (8:00pm) hun pawlin Kalewa township, Sin Ai Mah khuaneu kiangah kikaptuah uh hi.
” Gammang lakah kikap himawk in, tua munah langnih tuak a si aliam om uh. A taikhia man a suakta zong tampi mah om hi. PDF pawlte 10 val si in teh ” ci-in Kalay District PDF pan thunei khatin genkhia hi. Kikapna ah a si aliam PDF te bel akician lianin sazian kingahzo nailo ci-in genbeh hi.
Tulaitak lian kikapna bel Sin Mah Ai khuaneu kiang tengah hiphot ci-in PDF pawlte in gen uh hi. SAC pawlin bel thumanlo (zuau) bekbek tawh Sin Mah Ai khua kiang kikapna ah PDFte 28 si-in, Thau lawng 23 leh thauvui thautang tampi kimatsak ci-in Telegram account ah tuni November 10, ni zingsang lamin zuah thu khahkhia uh ci hi.
Ye U – Kalewa lampi leh Kalewa – Phaungpin lamka bom kiang a om Aung Chan Tha khua ah SAC pawlin phualsat uh a, tua khua pen PDF pawlte in ni 10 val sung a khakcip uh ahi hi. Tua munah SAC galkap 100 kim om uh a, tuate’ sungah Pyusawhtee te zong kihel uh ci hi. PDF pawlten a khakcip uh Aung Chan Tha khua ah SAC pawlin galkap a puakbehte a tun akipan kikaptuahna piang hi ci-in Kalay PDF khatin gen hi.
” SAC galkapte lah tam lua, Pyusawhtee lah tam sem uh. A galphual uh zong lim bawl mahmah uh! Gam mangpi lakah tawlpi khat lut suak thapaihna mun hilai” ci-in genbeh hi. November 3, ni zingsang (3:00am) hunin Kalay PDF pawlin Aung Chan Tha khua a SAC galphualpi umcih in a kapkhit akipan tatsat loin kikapna leh kinantuahna om hi. Aung Chan Tha Palik camp pen abeisa August kha sungin PDF galkapten a busim lai un, SAC pawlin vanleng tawh kap uh hi.
Shan State (Northern) leh Kawlgam nitumna leilum lamah October kha bei leh November kha kipat sung kikapna hangin, tualsung mite inn leh lo nusia galtai tampi om uh a, annek tuidawn akipan akisamte huhna dingin US $ Awn 1, huhna piak dingin UNOCHA zumpi in tuni November 10, 2023 ni-in thusuah bawl uh hi. Shan State (Northern) ah mipi 50000 kim leh Kawlgam nitumna leilu lam ah mipi 40000 val galtai uh cih thu UNOCHA thusuahna ah gen hi.
Hits: 4