Shan State (Northern) lamah Three Brotherhood Alliance pawlin “1027 Operation” min tawh SAC galphual busim akipatkhiat ni akipan Khuapi tampitak lakhia ta uh a, tuni in Namkham khuapi zong kilakhia / kikembip leuleu uh ahih thu Ta’ang galkap (TNLA) pawlin pulakkhia leuleu uh hi. Kawlgam buppi ah tuni November 11, 2023 ni ciangciang khuapi 9 kiciantak in kilakhiazo / kikembit zota ci-in Three Brotherhood Alliance pawlin pulakkhia hi.
“1027 Operation” kipatzawh ni 15 sungin akibuluak / kikembit khuapite pen; Chinshwe-hoe (ချင်းရွှေဟော်), Hpawng hseng (ဖောင်းဆိုင်), Ciukoh / Pansai (ကြူကုတ်), Theinnyi (သိန္နီ), Moekone (မုံးကိုး), Kwelone (ကွမ်းလုံ), Kawlin (ကောလင်း), Khampat (ခါမ်းပါတ်) leh Namkham (နမ့်ခမ်း) khuapite ahi hi. Hih “1027 Operation” pen Kokang – Ta’ang mun (Region) pan kipankhia hi a, tu-in Kawlgam sung State leh khuapi mun tuamtuam ah kizomto / kilawh ziahziah ta hi.
A diakdiak in Ta’ang galkap pawlte’ (TNLA) panmun lakna Namkham khuapi sungah tualsung mipite nuamtak leh suaktatak gamtang thei ziahziah ta ci hi. Ukna buluh SAC pawlin zong a munmun pan lei lam tawh tatsat loin, Thaupi tawh kap thapai uh hi. Tua bek tham loin vanlam panin zong nasiatak kap ngek ngek uh hi. Shan State sungah SAC galkapte pen Maymyo (Pin Oo Lwin) ah tawm khat om lai bek uh a, Mi -17 galvanleng tawh kap zel uh ci-in, Northern Alliance in thusuahna nei hi.
Hits: 5