Myanmar gamah galkapte in gam ukna lak (buluh) zawh kum thum sungin News Media na semte SAC in lam tuamtuam tawh a bawlsiatna / nencipna hangin, Media and Journalism lam nasemte tampi in nuntakna bei lawh bek tham loin, thusuah bawlna leh hawmkhiatnate-ah haksatna tampi om ahihna thusuah nasemte in genkhia ciat uh hi.
A diakdiak in Kawlgam sung a om Media lam nasemte pen hih haksatna tawh kidim phadiak uh hi. 2021 February ni 1 ni-in galkapte in Myanmar kumpi thuneihna a lak khit akipan Thuthak nasemte (Journalist) leh Media nasem kipawlna (Media Organization) kipawlnate khaktan / khawlsak bek tham loin journalist tampi in nuntakna suplawh / sihlawh uh ci-in Media nasemte in genkhia uh hi. Tuni ciang dong mah in ukna buluh (SAC) te’n Journalist te manin Media nasemte leh a zumpite buluh in Media nasep suahtatna kici limlim khaktan hi ci-in Idependent Press Council Myanmar (IPCM) pawl lutang Daw Nan Phaw Gay in genkhia hi.
“Hih theih zahzah tawh suakta tak a pulak khiat theihna lai tawh gelh khiat theihna om nai lo bek tham loin, Media nasemna tawh kisai suahtakna kisuplawh lai hi. Galkapte’n ukna a buluh zawh kum 3 sungah mat leh hen, bawlsiatna leh haksatna tampi thuak uh hi. Thong innte sungah Journalist tampi om lai banah mat dingin thu abawl laitak zong tampi mah om lai ahih manin, Myanmar khuahun hoih lam manawh nai hetlo ahihna kimuthei lai lua” ci-in IPCM Makaipi in genbeh hi.
Tua hi in, galkapte’n ukna a buluh khit akipan Journalist nasemte a bawlsiatna hangin a tamzaw gam pua lamah pusuak in mabante zomto suak uh hi. Dipkuat patauhna leh lauhuaina namkim tawh Media nasepna mah asem kenkan a om mah bangin, a khawlsan / a nusia zong tampi mah om ci-in Kawlgam sung a om Journalist khat in gen hi.
“Galkapte in thuneihna a lak khitah numei thukan (woman Journalist) lam bei tuam mahmah hi. Thukan thu suah bawl (Journalist) nasep nusia in, nasep dang tawh nuntakna a zong honkhat om khin ta uh hi. Tua bang mahin pasalte zong tua bang mahin Media and Journalism nasep nusia tampi om uh hi. Pawlkhat gam sungah lut kikin hiam tawi (Revolutionary) zong honkhat om uh.”
Kawlgam sung pan thuthak nasem (Journalist)te bitna omlo a, haksatna tuamtuam kawmkal pan thusuah bawl uh a, a diak diakin kikapna galphual ah omte ading lungmuanna omlo bek tham loin, thuthak kanna lam sangah hamsatna tampi om ci-in kikapna nasia takin a omna Arakan State ah a om thukan khatin genkhia hi.
“Tu laitak ka omna pen internet online kingah ngiatlohna mun khat hi in, News lakna ding bang mah kisemthei vet lo himai. Gam sung a om Media tuamtuam zong internet ngah lohna hangin, thusuah kibawl theiloin om ciat uh hi. A diakin Arakan State leilu lam a omte in thuak phadiak” ci in gen hi. Ukna buluh khit SAC in Media nasem pawl 15 khakcip uh a, Media nasem mimal 600 val manin pawlkhat bek khah khia pan uh hi. Tulaitak ciangciang Media nasem (Journalist) 50 kim thong inn sung kikhum lai in, SAC in Anesty a piak a pusuah sakte sungah journalist kihelkhol lo ci-in journalist khat in genkhia hi.
“A taktak ci leng Journalist 40/50 kim Khumcip lai thamtham uh hi. 2021 kum sungin bel Journalist 20 kim khah khia uh a, 2022 le 2023 kumte ah khat vei akhahkhiatna ah a tam pen mi 5 cih bang bek khah uh a, tulam ciangin bel mi 2 cih bang kihelzo bek hi mai. Mimal 50 bang pen thong (gilbem) sungah kem den uh. Thukhun tuamtuam tawh kum tam theithei dingin thu bawl tawmtawm lai uh. Anesty a om hang pusuak sak loin kem cip uh” ci-in gen hi.
Ukna buluh (SAC) in gamthu neihna a lak khit akipan Media nasemte nencip bek loin kikapna a nasiatna munte ah Internet khak cipna cihte hangin, Media nasemte in hamsatna tampi tuak uh hi. Galkap in ukna buluh khit Myanmar gam ii Media nasepna kum sawm lom asim khawl uh ahih manin, Myanmar gam pen leitung ah Media lam nasepna leh suahtakna / pulak khiatna (Freedom of Expression) lamah a suksia pen leh a niam penpen gam 10 sungah kihel ta ci-in, Reporters Without Borders (RSF) in 2023 kum bei thusuahna-ah pulak khia uh hi.
![](https://tongsan.org/wp-content/uploads/2024/01/01000000-c0a8-0242-e32c-08dc18f4dc71_w1597_n_r1_st_s-2-1024x666.jpeg)
Hits: 7