Pasian khat, Zeisu khat, Laisiangtho khat, ngeina leh pau zang khawmin Biakna pawlpite’ ki pawlna a neizo zolote pen politics ah pumkhat suak ding cih pen ahitheilo / lamet omlo hi. Banghang hiam cih leh Politics pen updan, deihdan, kalsuan dan bulphuh ding akibang in, hong gawm khawm / khuituah ding pen suahtakna (Freedom) bek ahi hi. Pasian min tawh nasem khawm theilote leitung ah bangin hong gawmzo ding a hiam?
Tua ahih manin biakna teng limlim (or) Pasian nasemteng limlim kipawlna -nasep khopna ding Pansan (platform) kisam masa penpen hi. Biakna thu tawh kitawsawn lohin minam leh gamvai kipawlna leh vaihawmnate kithahat leh kikalsuanzo taktak theilo hi. Tua mah bangin leitung gam lian leh gam khangtote sung zongah omzo tuanlo hi.
UK gamah Anglican pawlpi in support hi. Europe leh Germanany gam tampite Catholic pawlpi in support hi. South America te Catholic pawlpi leh Christian biakna mah in support hi. USA leh Canada zong Christian biakna pawlpite’ thapiakna (support) tawh kumpi gam suangzo bek uh hi. Asia gam teng zong Buddhist, Hindusim, Muslim leh Christian biaknate’ thapiakna (support) tawh gam lianpi dinmun tungzo / dingkhia zo uh hi. Aussie leh New zealand zong Catholic leh Christian pawlpite support tawh gamlianpi suak zo veve uh hi.
Tua ahih manin, Zomi leh Zogam thahat nuam taktak i hih leh Christian Biakna makaiteng ki holim in kipawlna kician GZA or Alternative in hong makaih kisam masa pen hi. Tua kipawlna in active kipawlna hong hih nangin Chritian pawlpi khempeuh panin sum tha tawh support in fulltime nasem leh office te i neih teh kalsuanna step 1 hong kipanthei pan ding hi.
Tulaitak GZA pen i muan i suan a hih hangin khasum sang a nasem khat zong om lo, office leh staff khat zong nei zolo i hih manin, mawhsakna khawng i neihloh ding thupi hi. Ahang in fulltime nasem omlo pin Zogam vaihawm ding i lamet leh i khial zo hi. Tua manin kipumpiak (Volunteer) nasep bek tawh office nasem ding leh gamsung gampua hong van zo ding mi kua mah omlo hi. Tua hih manin thungen kawmin biakna siate mahmah in hong lungngaih ding ka deih mahmah hi.
Zogam leh Zomi Kalsuanzia ding Lunghimawhna tawh,
Rev Suan Muan Thang,
M.A, MSW, DMin, PhD
Australia
Hits: 3