Chin State leitaw lam, Matupi khuapi a om Ukna buluh (SAC)te’ galphual Infantry Militant (304) Battalion Camp pen abeisa June 9, 2024 ni akipan Chin Brotherhood Alliance pawlte in luhden uh a, tuni June 18, 2024 ni zingsang lamin busimzo / lakhiazo taktak uh ci hi. Tua kawmkal ah CNA leh amau makaih Chinland Council sungah a belpawl pihte in, a hang omlo pi-in, Chin Brotherhood te kap gawp laizang uh cih kiza hi.
Hih bangin CNF leh belpawlte in thumaan lopi in, a kapna hangin Chin Brotherhood Alliance lamte a si aliam om tuak cih kiza himah leh thukician kithei nailo ci-in Matupi galphual lam pan thunei te’in gen uh hi. CNF leh a pawlpihte in Chin Brotherhood te a va kap ngiauna tawh kisai Thumanlo ahihna leh SAC tawh kibangin Ngongtat nasem pawlte ahihna thu Chin Brotherhood Alliance te in mipi tungah Thusuah khiatna (Statement) pulakkhia uh hi.
Hih Matupi khuapi lakna ah Chin Brotherhood Alliance pawl makai in, Arakan Army (AA) leh Yaw Army (YA) teng tawh kipawl uh a, Ukna buluh (SAC)te’ Infantry Military (304) Battalion Camp busim in, lakhiazo taktak uh hi. CNF leh Chinland Council te’n SAC te do loin, Revolutionary naseppihte a dona uh a tawpsan kei uh leh Chin Brotherhood Allliance tawh kikal maban kalsuanzia hoih hetlo thei ding cih kiza hi.
Hits: 3