Magway Division leh Chin State gamgi, Hakha Khuapi huam Bungzung khuaneu ah phualsat a om Ukna buluh (SAC) galkap 70 valte’ galphual pen December 17 ni nitak lam akipan CNF makai in, CDF-Hakha, CDF (KKG) leh CDF_Thantlang cih teng kipawlkhawmte in busim uh a, tuni December 18, ni zingsang lam (11:00am) hun pawlin lakhiazo cih thu kiza hi.
Hih Bungzung khua ah phualsat a om Ukna buluh (SAC) pawlin khualzin gamvakte leh mawtawte tung pan sum ngetna nei den uh ahih manin, tua thu hangin Chin Defense Force te in busim in a va kapzial uh ci hi. “Zanni nitak pan tuni zingsang dong kikap ung. Tuni zing nai 11 hunin galphual lakhia zo ung. Kido/ kikapna sungah ko lam pan Salai Van Tha Ceu leh Salai Van Dam in a nuntakna piakhia uh a, adang 8 liam hi. Amau SAC lamte zong 7 si-in, Captain 1 akihel galkap 6 hingmat ung” ci-in galphual akihel khatin genkhia hi.
Hih Bungzung pen SAC pawlte’ panlakna khua khat hi in, SAC galkap 100 kim kibusa uh a, hih bangin akilakkhiat zawh manin, Hakha khuapi laksuak zawhna ding mun leh mual leh galvai ading tampi phattuamna tampi om pah ci-in, genbeh hi. Ukna buluh SAC galkap pawl in December kha kipat lamin Bungzung khua inn 2 hal tum a, tu-a kidona kikapna zongah SAC in vanlam pan huhin nasiatak kap ziahziah uh hi mah leh kilakhiazo veve hi.
Hits: 4