Sagaing Region, Kanbalu Township leitaw lam Tin Nug Gyi khuaneu a om SAC galkapte leh Pyusawhtee kigawm 130 kimte’ omna gal phualpi pen Tualsung PDF pawlin busim in lakhia uh bek tham loin SAC sawltak Pyusawhtee pawl 25 si cih thu NUG (MOD) zumpi in pulakkhia hi.
Tuni (January 11) zingsang (02:00am) hun pawlin No.(1) Military Region, Kantbalu District Command, makaihna tawh Kantbalu District PDF galkapte leh Township sung a om khuaneu 3 teng PDF kipawl khawmte in busim uh a, galvan Carbines mal 8, G-3 lawng 1, Thau tom (Shoot Guns) Lawng 5, Thautang (Ammunition) leh galvan honkhat ngah khia cih kiza hi.
” Drone lam vaisai pawl lut masa in bomb khiat hi. Tua khitteh Thaupi lam sai pawlin kap uh hi. SAC sawltak Pyusawhtee te a ihmutsip laitak uh ahih manin, kiging manlo uh hi. Khangmalong a om hun laitak n PDF Thaukap siamte lut suk pahin kapzial uh hi. Camp lakhia pah bek tham loin haltum pah uh ” cih thu gal mainawk Kantbalu PDF galkap khatin genkhia hi.
SAC galkapte leh Pyusawhtee te ihmutsip laitak kibingphawn suak ahih manin, Camp kisutkhia zo cih thu genkhia hi. Tin Nug Gyi khuaneu a phualsat Pyusawhtee Camp pen Than Kone – Kaboo mawtaw lampi tungah om hi-in, SAC galkapte leh Pyusawhtee pawlin khualzin mite’ tung pan nisim in sum ngen den uh ci-in Kantbalu khuami khatin gen hi.
” Mawtaw lampi ah gate bawlin khuazin mite’ tungah sum ngen den teng simai ta uh ahih manin, lungdam lua ung” ci-in khuamiten gen uh hi. Kikapna man khit ciangin Kantbalu khua sungah 6006 Tenk battalion pan Tenk Mawtaw 4 tawh lut uh a, galhuh SAC galkapte a tun ciangin, Kuu khuapi innte ban halin, Inn bangzah kangtum cih kitheician nailo hi.
Hih SAC galkapte galsimna leh Inn halna hangin a kim a khuaneu teng ahi; Ngaya Neh, Tuubo, Kuu myo, Daung Tee Kone, Felan Chai, Tayeit Gaung, Nyaungzin Gyi, Min Kone leh BoThe Kone cih khua 9 pan khuami 10000 kimte galtai mang uh cih kiza hi.
Hits: 1