Sagaing Division, Yinmabin township, Lettaungnge khuano gei ah Monywa pan a kuankhia SAC gal mainawk pawl leh mipi galkap Union Liberation Front (ULF) te nai 4 sung nasiatak kikaptuah uh a, SAC galkapte 17 si cih thu Union Liberation Front (ULF) thugenpi Ko Jordan in genkhia hi.
SAC galkap 80 kim pha uh a, January 19, 2024 ni-in Monywa pan Chindwin gun dung zui-in a tuaksuk uh Salingyi kuam ah ni 3 sung tamcip uh hi. January 21 ni nitak lam (1: 30pm) hun pawlin Pale-Yinmabin-Salingyi kituahna Lettaungnge khua gei ah nasiatak kikaptuah uh ci hi.
“SAC galkap lam pan misi luanghawm tampi mu ung. Melmuh ciaptehna ka nei thei pah uh a, galvan tampi zong ngah khia ung. SAC gal mainawk pawl bel Pale khuapi lam manawhin pai suak uh” ci-in Union Liberation Front (ULF) thugenpi Ko Jordan in gen hi.
Hih kikapna ah ULF, Local PDF leh Battalion kipawlkhawm uh hi-in, amau PDF lamte mi 5 nasia lua loin liam uh ci hi. “Salingyi khuapi nitumna lam pan SAC pawlte hong kuan uh hi a, khuamite a si aliam zong om banah ganhing pawlkhat zong si” ci-in Salingyi PDF khatin gen hi. Lettaung Nge kikapna pan MA lawng 3, RPG tang 4, 60MM tang 4, 40MM tang 15, 5.56 thau tang 2000 val leh Thauvui thautang tampi kingah cih thu ULF V-2 in pulak hi.
“SAC galkapte khua sung hong lut simin, inn pan vante lak manman, puak zawh zahzah tawh kitai khia zel hi. Gal tai thapai cih pen ngawngkai sa lua mahmah ing. Lungnuam tak om hithiat nuam lua ta ing” ci-in Pale khuapi ateng khuami numei khat in gen hi. A beisa January 17 ni-in SAC pawl Salingyi khuapi huam Sar Tone khuano sung lutin inn 7 hal uh ci-in Pa-Ah-Pha (Salingyi township) in pulak khia hi.
Hits: 2