Tongsan Media Group | June 25, 2023 ||
Manipur State ah minam buaina hang a bawlsiatna leh thahna a thuak Kuki-Zomi minamte tawh kibang in ka thuak khawm uh hi ci-in, Mizoram State a om Mizo minam buppi in lAizawl khuapi ah July 25, 2023 ni-in lungphona (Demonstration) nasiatak nei uh hi. Hih Lungpho lahna hunah Mizoram State sunga om kipawlna lian tuamtuamte ahi; Central Young Mizo Asso ciation(CYMA), Mizo Upa Pawl(MUP), Mizo Hmeichhia Insuihkhawm Pawl (MHIP), Mizo Zirlai Pawl(MZP), Mizo Student Union (MSU) cihte akipan kipawlna 5, a makaih NGO Co-ordination Committee in panlakna nei hi. Aizawl khuapi sung bek hi loin, Mizoram a om Khuapi khempeuh ah mipi Awn tampi in lungphona nei ziahziah cih kiza hi.
Lungphona hun sungah makaipi asem zawdeuh pen Central Young Mizo Association (CYMA) hi a, amakaipi President Pu Lalngheta in a genna ah, ” Manipur State buppi in Manipur a om i sanggamte’ thuakna in mipite hong linglawng sak mahmah a, Manipur State kumpi thuneite nangawn in awlmawhlo / dalzo nawnlo uh ahih manin, i sanggamte nuntakna tampi bei lawh khin ta uh hi. Inn le lo, biakinnte mei tawh haltum sak uh a, a diakin numeite guaktang in koihin mipi’ mai ah mawhpih in bawlsia uh hi. Tua manin, hih zah a bawlsiatnate mihing ngaihsut zawh ding leh maisak zawh ding thu hilo hi” ci-in pulakkhia hi.
Tua banah hih Manipur buaina tawh kisai Mizo / Zosuanten khutzep in etmawk theih hilo ahih manin, India Central kumpi in a manlang takin thukhenna / vaihawmna a neih mengmeng na ding i thum hi ” ci-in CYMA President Pu Lalngheta in pulakkhia hi. Mizoram State, Aizawl khuapi ah tuni July 25, 2023 ni akibawl Lampi tung zui a lungphona pen zingsang lam (11:00am) hunin kipan a, Chanmari lamkapi leh Kulikawn pan mipite khennih / pawlnih kisuah in kipaikhia a, Mizoram State Governor Residence (Raj Bhavan) leitaw lam Kongpi (Gate) kiangah kituntuah uh a, tua mun ah mipi khempeuh thugenkhopna kinei-in, tuni Lungphona hial bawl uh cih kiza hi.
Hih Lungphona hun ah Mizoram State, Chief Minsiter Pu Zoramthanga, Ministers, the Speaker of the Parliament leh Members of Parliament te akipan Political party tuamtuam pan mipi 100000 val kihelthei uh ci hi. Manipur State ah nampi ahi Meitei (Katee) minamte in mualmi minam tawmte ading akikoih India thukhunpi (Constitution of India) ah minam kiciamtehna (Scheduled Tribe) ah lutzawh na dingin abeisa hun sawtpi lai akipan India kumpi tungah ngetna kinei hi a, Meitei ten deihlo uh ahihna tawh tuni tuhun ciangin hih bang buaina lianpi a bawl uh ahi hi.
Hih Constitution of India sung a om mualmite’ ngah ding hamphatna ahi Minam kiciamtehna ((Scheduled Tribe) pen Meitei te’n deihlo uh ahih manin, abeisa May 3, 2023 ni-in Manipur State, / Churachanpur khuapi ah Kuki – Zomi kici mualmi namte’n kipumkhat in lungphona “Solidarity March” nasiatak nei uh hi. Tua bangin lungphona a neih uh ciangin Meitei te tawh kikal ah kitelkhialhna / buaina kipankhia a, tuni ciang dong nam kisukmai nopna hangin nuntakna tampi bei lawh hi.
Hih kibuaina hangin mihing nuntakna bek hi loin, Meitei te’n Kuki- Zomite’ biakinn 250 val mei tawh kihaltum sak in, mihing 130 val thatlum khin uh cih thu Indigenous Tribal Leaders’ Forum (ITLF) in pulakkhia uh hi. Tua banah abeisa Nipi kalsung mahmah in Social Media ah Kuki – Zomi numei 2 te Meitei mihonpi in mancip in, a nik leh puan suahkhiat sak bek tham loin, a guaktang in mawhpihna a mulkim huai mahmah Video Clip te leitung maitang ah kithehthang hi.
Hih thupiang tawh kisai pen India News khempeuh i a pulakkhiatna ah Manipur State sung a om Kangpokpi District, B Phainom khua ah abeisa May 4, 2023 ni a thupiang hi a, tua nungak 2 te pen Meitei mihonpi in buan / mawhpih zihziah cih kitheikhia hi. Tua Video sungah akimuhzia ahih leh Meitei mihonpi in nungak 2 te pen a omna Room sung pan kaikhia uh a, a puansilh hawkkhiat sakin losung ah paikhiat pih uh cih kimukhia hi.
Tua thupiang pen Manipur State, Police station ah thu bawlna kipuak lut a, kha 2 ciang dong thubawlna kineilo ci hi. Ahi zongin tun Online Social Media tungah Video tawh kiciantak kimukhia ahih manin, a mulkim huai mihing kibawlsiatna lianpi ahihna leitung bupin kitheikhia ta hi.
Source: The Hills Journal
Translated: Tongsan Media Admin Team
![](https://tongsan.org/wp-content/uploads/2023/07/362891057_755302536598802_3413837787803322457_n-1024x768.jpg)
![](https://tongsan.org/wp-content/uploads/2023/07/361621988_755302266598829_8120085364175416175_n-768x1024.jpg)
![](https://tongsan.org/wp-content/uploads/2023/07/357751743_755303269932062_5657172969381425660_n-1024x683.jpg)
Hits: 5