Chin State, Matupi Township, SAC galphual pen Chin Defense Joint Force pawlin a busim khitah galphual encianna (Checking) nei uh a, Thaupi tangte leh MA thautang 100,000 val ngah khia uh cih kiza hi.
Thaiboi Camp pen abeisa December 18, 2023 ni in Chin Defense Force (Matupi), Chin Defense Force (Mindat), Chin National Organization (CNO/CNDF) leh Chin Defense Force (Lautu), tengin kapkhawm uh a, SAC galkapte in Dialkhai kang (White flag) khai in, Camp nusia in tai mang uh ci hi. Hih Camp lakna / kikapna ah Chin Defense Force (Mindat) pan galkap khat si-in, atai khia SAC galkapte pen Chin Defense Joint Force te’n sulzon uh a, langnih kikaptuahna om leuleu cih kiza hi.
” Tua langnih kikaptuahna ah CDF Mindat galkap khatin nuntakna bei lawh mawk ei” ci-in CDF-Matupi pan thugenpi Salai John Kim in gen hi. Thaiboi Camp pan a taimang SAC galkapte akisulzonna ah zong Chin Defense Joint Force pawl khat si leuleu cih kiza hi.
” Matupi pansan 304 Battalion pan galhuh dinga pai SAC galkapte leh Thaiboi Camp pan a taimang SAC galkapte kikal ah kitelkhial in, kikapna hangin 4th Battaion pan galkap 2 si hi. Adang galkap khat zong mangcip ahih manin kizonsan laitak hiphot “ ci-in CDF (Matupi) galkap khatin gen hi.
Matupi Township, Thaiboi Camp busim laitak mahin SAC pawlin Vanlam pan bomb khiat na hangin Matuipi Township, Vankai khuaneu pan khuami pasal 3 leh numei 1 in sihlawh uh a, pasal khatin liamna ngah cih kiza hi.
Hits: 3