NATO pawlmi (member) te leh amau bitna (Security) ding banah Ukraine gam tatsat loin huh zawhna ding ngimna tawh US$ 1200 millions man Thaupi leh Galvan nam tuamtuam lei ding leh thoh khiatna dingin NATO Genneral Secretary Jen Stoltenberg leh NATO ii galvan kholna lamah Thusaipi (head of NATO’s arms procurement agency) ahi Mss. Stacey Cummings te in thukimna suaikai (signing) uh cih thu NATO Thuthak saite’n pulakkhia uh hi. Tua thukimna suaikaihna pen NATO headquarters, Brussels, khuapi, Belgium gamah nei uh hi.
Russia te’ simmawhna galpi a do Ukraine te pen NATO Member gamte in Thaupi leh thau tuamtuam tawh tatsat loin a huh theihna dingin, amau gam ciatin galvan thauvui thautang kicing aneih uh kisam hi ci-in, Jens Stoltenberg in genkhia hi. Russia gal dalzawhna dingin Thauvui thautang kilamdanna leh khauhpaina tungah kinga ahih manin, NATO member gamte in Galvan kicing leh a kisamte hunlap in piakkhiat zawhna ding thupi hi ci-in Jens Stoltenberg in genbeh hi.
2023 July kha akipan NATO member gamte ading $ 10 billions man galvan leibeh nading thukimna suaikaihnate nei khin uh a, tutung a tawh hi leh $11 billion val (over ten thousand million) val pha ta ci-in Jens Stoltenberg in gen hi.
Hih galvante khol a leina ding thukimna suaikaihsa sungah Patriot missile ading $ 5 million, 155mm Thaupi (cannons) leh thautang (ammunition), Sik mawtaw suksiatna (anti-tank missiles) leh Tank thautang (tank ammunition) man ding $ 4 million cihte kihelkhin hi ci-in NATO General Secretary Jens Stoltenberg in genbeh hi.
Hits: 4