Rakhine State, Myauk-U khuapi kiang Ram Chaung khuaneu a Arakan Army (AA)te’n a mat Ukna buluh (SAC) galkapte leh a innkuanpihte a koihna uh Inn leh sanginn teng pen abeisa January 18, 2025 ni-in SAC galkapte’n Jet Figther tawh bomb khiat khial uh ahih manin, numei leh naupang kihel SAC te’ innkuanpihte mi 28 si in, 25 in nasiatak liam cih thu Arakan Army (AA) thukizakna nasemte’n pulak uh hi.
“January 18, nitak lam (4:45pm) hun pawlin Arakan Army (AA)te in amat uh SAC galkapte leh a innkuanpihte a koihna Sang inn leh Zum innte pen SAC galkapte’n Jet Fighter tawh bomb khiat kha uh a, numei leh naupang kihel 28 mul kim huai takin si zihziah uh a, 25 val liam hi. A liamte Zato kipuakpah hi mah leh a nasia liam pawl khat sibeh thei lai ding uh hi ” ci in AA thukizakna lamte’n genbeh hi. SAC te pen amau thuneihnopna bekbek mah bulphuh in, akiman amau mite nangawn don hetlo in a om uh pen Galkap thukhun (Military code) tawh kituak hetlo ngongtatna leh galkap thukhun palsat uh ahi hi.
Tukum 2025 January kha sung akipan SAC te in Vanleng limzat semsem uh a, Kawlgam sung a munmun ah mulkim hetlo takin mipite bomb khiat ziahziah ding geelna a neihna thusim zong kithei khia hi. Tua thusim kitheihna hangin, Arakan Army (AA) te in mipite’ tungah thu zaksakna nei uh hi. ” Na omna mun uh Ngongtat SAC galkapte’n hong thei khia pahpah ahih manin, na omna mun ciat uh ah Internet leh Phone zatzia kidawm un! ci-in Arakan Army (AA) galkapte’n mipi theihsakna nei uh ci hi.



Hits: 4