Ukna buluh (SAC) pawlin 2023 January kha pan November 17, 2023 ni ciangciang Van lam tawh Kawlgambup ah mipite akapna hangin mipi 259 in sihlawh khin uh a, Chin State pan mi 37 in nuntakna bei lawh khin ci-in Assistance Association for Political Prisoners-Burma (AAPP) in November 17 ni-in thu suahna nei hi. AAPP in a kaihkhopna ah Kawl gambup huamin mimal 259 in sihlawh uh a, Sagaing Division pan 193 si-in, a tam pen hi a, Chin State pan 37 si cih thu sazian kikipsak nei uh hi. A kitangsam lai misi 86 om laite pen sazian kikipsak zo nailo ci hi.
SAC in langnih kikapna om lopi-in November 15 ni nitak nai 7 hun pawlin Chin State Matupi khuapi huam Vuilu khuaneu ah Jet Fighter 2 tawh vanlam pan Sanginn leh inn honpi khat akapna hangin, sang naupang 8 akihel mimal 11 si hi. Kawlgam ah galkapte in gam thuneihna a buluh uh 2021 February 1 ni pan 2023 November 17 ni ciangciang Democracy ngahna dingin nuntakna luang khamin akipiakhia galhangte leh tualsung mi a si vekpi 4190 pha ta a, mimal 500 kim amin sazian kipsakna theihna dingin kikansan laitak ci hi.
Thuman lopi in mat leh hen a thuak mimal 25420 pha ta , mi 19693 te kepcipna thuak lai uh hi. Tua sung pan 8067 te bawlsiatna thuak uh ci hi. Spring Revolution hangin nuntakna a piakhia / gawlkhaina leh gawp atna a thuak mi 120 om in, gilbem ah kikem na pi’n a mi omlo a thukhenna thuak 43 om ci hi. Amau mimal /pumpi omlo a thukhenna thuak 119 pha ci hi. Tua banah kimatna thuak a thukhenna om thei nai lo leh thukhenna om khin akikhahkhia mimal 5727 pha ta ci-in AAPP in thusuahna nei hi.
Hits: 7