Chin State, Tedim khuapi ah November 7, 2023 nitak lam (6:30pm) hun pawlin Suft Mawtaw khat sungah bomb puak khamna hangin CNA Lieutenant khat akihel CNA galkap 3 in sihlawh cih thu Tedim tualsung mite tungtawn in kiza sawn hi. Galvai nasem dingin Tedim khuapi lutna lam Lawibual veng ah Suft mawtaw sungah akipua bomb puakkham hi-in, mawtaw tungah atuang CNF galkap 3 te leh Mawtaw a them aneng in lengkek ci hi.
“Bomb puak khapna tawh kisai, kei theihna ciangah Tedim khuapi sung lut ma-in, bomb puak khap sak dingin bawl khol uh hih tak a, hunlo phatlo hun sung khatin puak kham sak kha uh” ci-in Tedim township PDF (Pah Kah Phah) makai Sia Jabez in genkhia hi. Upmawh loh laitak Bomb puakkhapna hangin nuntakna a bei lawh teng pen Lieutenant Salai Alimar, Salai Ronald leh Salai Joshua te ahi uh hi. Amau mi 3 teng aluang aban a omna mel kitheilo zahkhop in zanmang bek tham loin, Mawtaw 1, Motorcycle 1 leh a kim apam a om inn leh lote zong naksiat mahmah ci hi.
“Agin bel ngaih peuhmah. Ko, zong bang piang cih bel thei kei ung. Lau veve ka hih manun a pua lam pusuak ngam vet lo himai. Ka innveng teng inn 5 bang bel kisia gawp. Mawtaw bel kangtum / zancip in, Motorcycle zong zancip dikdek himai ” ci-in Tedim tual sung mi khatin genbeh hi. Tedim khuapi leh khuapi kem PDF- Zoland leh Tedim (Pah Kah Phah) ukna nuai-ah thupiang hi lo banah ukna buluh (SAC)te’ gamtatna / tualbualna ngei mun cih bang zong hilo sawnsawn ci hi.
“ Hih bangin Tedim khuapi sungah CNA galkapte a nuntakna uh abei manin PDF-Zoland leh Pah Kah Phah te’n CNA tawh kibangin ka dahpih mahmah uh cih thu pulak nuam masa ing. Hih bang tuahsiatna hangin, Revolution nasem tuaktuak hihna tawh ka lungnuam het kei. Ko tual sung a om mipite’ tungah genkholhna leh gencianna nei masa loin, hih bang gamtatna leh nasepnate’ hangin, khat leh khat kikal kimuanna akiam ding bel ka lung nuam het kei” ci-in Sia Jabez in genbeh hi.
Bomb puak khapna hang a nuntakna abei lawh CNA galkap 3 te’ luanghawm lakna-ah CNA te’ huh ngetna tawh kizui-in, PDF-Zoland in lungsim picing tak leh thukhual takin misi luang a them a neng kaikhawm in vaipuak laksak uh cih kiza hi.
Hits: 14