SAC galkapte in Chin State, Tai Ngen khua amau Camp ngah kikna ding nasiatak hanciam uh a, tuni January 17, zingsang in galkap 60 kim tawh Gal mainawk kipankik cih thu Chin Defense Force kipawlkhawmte in gen uh hi. Sagaing Division leh Chin State gamgi a om SAC galkapte leh Police 30 kimte’ omna hih Taingen Camp pen abeisa January 12- 16 ni nga sungin Chin Defense Force belpawlte in busim in lakhiazo uh hi.
Abeisa in 5 vei kibusim ngei khin a, hih Taingen Camp hanciamna ah langnih tuak asi aliam tampi om hi. Camp lakkhit akipan Chin Defense belpawlte’n nungkik in nusia cih kiza hi. Tua Taingen Camp lakna ah Thau mal 30 kim a ngahna uh Social meia ah Photo tawh kimuthei hi. Tuni Janaury 17 ni-in Taingen khua Camp tawh Tai 30 kigamlatna Kalaymyo ah phualsat SAC galkapte in gamsung lampi tawnin gal mainawk uh cih thu CDM Siyin in genkhia hi.
” Galkap 60 kim pha dingin ki-ummawh hi. Kalaymyo pan Tai 20 kim tungto ta ci hi. Taingen tunna ding Tai 10 kim pawlah om uh. Tuzingsang bel kikaptuahna om kei” ci-in CDM (Civic Defense Militia) Siyin pan thukizakna lam Vaipuak nei pa in tunitak lamin genkhia hi. Akim le pam a om khuamite bel ahih theih lai teng mun muanhuai ah taimang dingin CDM Siyin in zasakna nei hi.
India – Myanmar sumzuak sumbawlna lampi tung a om kizopna mun laizang mahmah ahi Tai Ngen khua pen abeisa 2022 janaury kha bul pawlin SAC galkapte’n galphual in nei uh a, khuazin gamvai mipite’ tung pan sum ngen zel uh cih thu Chin Defense pawlin gen uh hi.
Tua mawhsakna tawh kisai-in, SAC tung pan dawn kikna om nailo hi. Tukha sung Chin State sung kikapna tawh kisai dinmun pen SAC in Thusuahna leh genkhiatna peuh mah nei loin, dai khikhe uh hi. CNF thugenpi Salai Htee Ni in Taingen Camp laknopna bulpi pen mun thupi / mun laizang khatah om ahih manin, lakkhiatloh phamawh ci hi.
“Tai Ngen Camp panin pai suak leng India – Myanmar boarder No. (2) trade route lampi ciang kizomsuak hi. Rih Camp pen kilakhia khin a, tua tawh akizom lam lianpi hi-in, tua banah bitna lam tawh kisai mipite’ sumzuak sumbawlna lampi tungah om ahih manin, galphual dingin mun lem (Strategic Camp) mahmah khat ahi hi. Tua manin hih Camp pen lakkhiat loh aphamawh ahi hi ” ci-in genkhia hi.
Ni 5 sung vilvel Camp lakkhiatna ah Kalaymyo pansan SAC battalion galkapte in Thaupi tawh huhin akap banah Vanlam pan zong 6 vei bang kap ngekngek cih thu CDM Siyin in pulakkhia hi. Tua Camp a om SAC galkapte Galvan khia in, kipumpiak ding a zaksak hang un, ut tuanlo uh ahih manin, busim in kikapna nasiatak piang ahihna thu CDM Siyin pan thukizakna lam vaisaipi in genkhia hi.
” Taingen Camp bel nasiatak leh muanhuai tak kibawl hi mai. Singluang tawh dawlnih in kilam a, Sehnel ipte kiciang sitset in, galpanna Leihawm zong L-limin kito banah Overhead pen pi 6′ valin kilam hi. Lutang a dawk mial bekin kibawl in, muanhuai takin kilam hi. A sung lam pan taikhiatna ding baih paklo hi. A pua lam panin lut zawhna ding zong baih pak lo veve hi” ci-in CDM Siyin makaipa in genbeh hi.
Nasiatak a kikapna hih Taingen Camp ah SAC lam pan Captain level akipan galkap vekpi 30 kim si uh a, CDF belpawl lam pan 8 si-in, honkhat liam uh hi. CDF kipawl khawm teng pan misite pen CDF-KKG pan 4, CDF-Hakha pan 1, CDF- Hakha pan 1, CDM Siyin pan 1 leh CNA pan 1 ahi hi.
“CDF belpawlte pan liamna ngah 40-60 kikal om hi. Vanleng tawh bomb khiat uh a, Thaupi tawh tatsat loin hong kap uh hi. Tua banah Landmine sikkhial zong om hi. SAC galkapten lah Galvan khia nuam hetlo uh a, a sih dongin do tinten uh hi “ ci-in CDM Siyin thukizakna vaipuak te’n gen hi.
Chin State sungah galvan tawh kido masakna munte pen Rih Khawdar khuapi, Lai lenpi leh Rihzua khuapite pen Chin defense force belpawlte in busim in lakhiazo uh a, Webula, Hnaring, Surkhua, Makuinum cihte zong kilakhia khin mang hi.
Hits: 3