Abeisa Janaury 10 ni akipan Rakhine State, Minpya khuapi ah SAC leh Rakhine galkap (AA)te kidona nisim khauhpai semsem a, tuni January 17, ni-in zong Sitthwe pansan SAC galkapte’n Vanleng leh Missile tangpite tawh nasiatak kap ngekngek uh ci-in khuamite’n gen hi.
Minpya khuapi ah SAC Infantry battalion te ahi No (379), No (380) leh No (541) pawlte’ phualsatna mun pen January 10 ni akipan AA in nasiatak do uh a, SAC leilam, tuilam (Navy) leh vanlam (air force) tawh nasiatak thukkik uh hi.
“Kidona bel nisim khauhpai mahmah hi. SAC te galphual mun 3 busim uh ci hi. Tua hi in, SAC galkap lamte tuigalkap (Navy) pan leh Vanleng tawh tatsat loin nikhat 9-10 vei val bomb khiat ngekngek uh “ cih Minpya khuapi tawh kinai Pauktaw Township sung ateng pasal khatin gen hi.
Minpya khua kikapna ah zanni January 16 ni-in SAC te’n Vanleng tawh tampi vei bomb khiat ngekngek banah Missile zong tawh kap uh cih thu Rakhine mi khatin gen hi. ” Zanni-in double Missile te tawh kap uh ci hi. Minpya khua ah kikapna nasia lua. SAC lamte’n Jet Fighter leh Helicopter tawh tatsat loin bomb khiat uh “ ci-in in khuamite’n gen hi.
Sittwe khuapi lam pan Minpya lamah lag huh dingin apai Tembaw khat zanni in Pauktaw khuapi kiangah AA pawlin kap sak uh ahih manin, minutes 15 sung nasiatak kikaptuah uh ci-in Pauktaw khuami pasal khatin gen hi. Minpya khuapi ah phualsat SAC battalion 3 te’ sung pan Khah Mah Zah -380 battalion pen AA in busim in lakhia uh a, a om lai Khah Mah Zah – battalion nihte pen AA in akizom in sual ngekngek uh cih thu khuami thuthak semte’n Rakhine Information Center ah pulak uh hi.
Minpya township buppi pen AA in ukcip banah SAC Khah Mah Zah Campte nasiatak do uh a, SAC lamte zong Vanleng tawh do thukkik banah galhuh vanlengte tawh nasiatak bomb khiat uh ci-in khuamiten genbeh uh hi. Khuapi sung leh Township huam sung a khuaneute zongah kikapna khauhpai ahih manin, January 10 ki akipan tualsung mite Inn leh lo nusia in galtai mang uh hi.
Tualaitak Rakhine State sung Township tampi ah kizopna Phone linete kisusiacip ahih manin, Township ciatah khuamite kizopna om thei nailo ci hi. Tua mah bangin Yathe Taung Township a om Bathali, Nyaungpin Hla, Pya Chaung gyi leh Kyain Tha akipan khuaneute zong vanleng tawh bomb khiat uh cih thu Northern Three Brotherhood Alliance pawlin zanni nitak lamin tangkona nei uh hi.
Myauk U phualsat a om SAC Khah Mah Zah (540) battalion in zong Myauk U township, Gaing Taw khuaneu ah Thaupite tawh kap uh a, khua kim a om zanglei sungah bomb tangte kia ahih manin, kum 57 apha Pasal khat leh kum 17 pasal khatin liamna ngah uh hi. Tua banah january 15 ni-in Myauk U township Myaungbui khuaneu pen Vanleng tawh a kapna hangin, pasal 2 si-in, nupi naupai lai khat leh pasal 2 liam uh ci hi. Rakhine State sungah kidona nasia semsem ahih manin, tualsung mite a si leh aliam nisim in om den hi.
AA te’ Ukcip Paletwa Khuapi Dinmun:
Kaladan Gunpi lulam Chin State leitaw lam a om Paletwa khuapi a om SAC galphual khempeuh pen January 10 ni-in Arakan Army (AA) in a vekpi busim in, lakhia khin banah Khuapi zong ukcipzo uh ahih manin, SAC pawlin Vanleng tawh Bomb khiatna hangin khuamite a si, aliam tampi om uh ci hi.
Zanni January 16 ni-in zong Kye Lay khuaneu ah bomb a khiatna hangin naupang 1 akihel mi 3 si uh a, 3 liam cih Northern Alliance te’n pulakkhia hi. Paletwa township sung Phone line kisuk siatna hangin khuamite’ dinmun tawh kisai kancianna kineithei nailo cih thu Paletwa township MP Salai Myo Thaik in gen hi.
” Kye Lay khuaneu ah liamna, sihna om cih pen aman mah hi. Mi bangzah si cih bel ko, khuamite tawh kithuzakna kineithei nailo ka hih manun, gencianna haksa “ ci-in 2015 leh 2020 Election ah gualzo NLD MP Salai Myo Thaik in genbeh hi. Tlaitak lian Sami khuapi akihel Paletwa khuapi sung a om tualsung mite zong Khuapi sungah lut ngam nailo uh a, taikhia mang laitak uh cih kiza hi.
” Tulaitak bel gal leh sa vai ah Bomb khak ding launa cihte hangin, khua sungah a lut kitawm mahmah “ ci-in, Salai Myo Thaik in genbeh hi. Tulaitak lian Paletwa Township bupah galtai a om Tualsung mi vekpi 30000 val phata a, tua galtaite ading nek leh dawn haksatna tampi kituak ci-in gen hi.
Hits: 1