October 10, 2023 || Tongsan Media Group ||
Kachin State, leilu lam Kachin Independent Army (KIA) te’ phualpi Laiza khuapi pan tai nih (2 miles) gamlatna mun a om galtai mimal 500 kimte’ phualsatna Mung Lai Hket (IDP Camp) pen October 9, 2023 nitak lamin Ukna buluh (SAC)te’n Vanleng tawh Bomb khiat uh a, mi 32 si-in, 60 liam uh ci hi. A liamte’ sung pan 44 zato kipuak ci-in KIA thugenpi Colonel Nawbu in gen hi.
SAC te’n Mung Lai Hket IDP Camp vanleng tawh akap laitak in, lau in a taikhia naupang 13 leh adang tampi kihel uh ci hi. Hotkhiatna nasem pawl (Rescued Team) ten Inn le lo kizancip kawm pan misi luangte lakkhiatna ding nasiatak hanciam uh a, a liamabai pawl khatte a nuntakna uh lamet huai nawnlo dinmun tampi om ahih manin, misi kibehlap thei lai ding ci hi.
KIA leh SACte’ kikapna pen abeisa July kha sung akipan Laiza khuapi kiang Namsnyang mun tawh kizopna mun teng ahi Myitkyina – Bahmaw lampi tungah kikapna nasia mahmah a, SAC galkapte in nak lelh mahmah hi. SAC lamte’n vanleng tawh nasiatak kap zel uh a, tutung petpet ciangin tualsung mipite’ omna Mung Lai Hket (IDP Camp) mui tunpi in nei-in a kapzan uh hita hi. Misite pen tuni October 10, 2023 ni-in vuina nei uh a, Kachin State buppi ah dahna pulakkhiatna limin Kachin Dialkhai (Flag), alang ciang bek khai uh hi.
Ukna buluh (SAC) te’n abeisa 2022 October kha sungin zong Kachin State, Phakant township, Anantpa area a om mipi teenna mun khat Vanleng tawh kap uh a, mipi tampi leh nasem tampi banah lasa siam minthangte leh KIO /KIA nasem kigawm vekpi 100 val si hi. Tua a kapna hang pen KIO kumcin phawkna pawi bawlni ahih manin, SAC te hehna leh thangpaina hang ahi hi.
Tua bang mahin, Sagaing Division, Kantbalu township, Pazigyi khuaneu ah NUG zum honni in, Ukna buluh (SAC) te’n Vanleng tawh bomb khiat uh a, tua laiah a paikhawm mipi 170 val si-in, tampi liam hi. SAC galkapte in Sang innte, galtaite’ omna Campte, teenna khuaneu tampi Vanleng tawh bomb khiat-in, Thaupi thauneu tawh nasiatak kap den uh hi.
Source: Kachinland & Peoples Spring
Translated: Tongsan Admin Team
![](https://tongsan.org/wp-content/uploads/2023/10/387854610_659836119548517_5786795173789502939_n-1024x768.jpg)
![](https://tongsan.org/wp-content/uploads/2023/10/387176908_659945316204264_9031885961339505734_n-1.jpg)
![](https://tongsan.org/wp-content/uploads/2023/10/Untitled-design-9-1.webp)
![](https://tongsan.org/wp-content/uploads/2023/10/signal-2023-10-10-124529_002-2-1024x682.webp)
Hits: 9