Chin State, Matupi Township, Weilu khuaneu ah November 15, 2023 nitak (7:00pm) hun pawlin ukna buluh (SAC) te’n kikapna om lopi-in, mipite ngimna vilvel tawh galvanleng Jet Fighter 2 zangin bomb khiat uh a, khuami 11 si-in, tua sungah naupangno 8 kihel ci-in khuami khatin gen hi. Hoilu khua sungah inn 18, sanginn 2, leh Christian biakinn 2 kisiacip ci hi.
CDM lut sang Sia U Halawng pen nitak sangnaupangte laihilh kim lai bomb in kha lum ci hi. Misiteng ahih leh U Awmsa (Kum 65), U Tem Nai (Kum 35), U Halawng (Kum 34), Mg. Samuel (Kum 12), Mg. Kee Ning (Kum 9), Mg. Nyan Win Aung (Kum 7), Mah Li li Moe (Kum 5), Mg. Thang hung ( Kum 11), Mah Khaing Za Tin ( Kum 11), Mah San San (Kum 7), leh Mg. Bui Kung (Kum 7) te kihel uh hi.
A nunung pen thuzakna ah liamna ngah mi vekpi pen numei 4, pha uh a, Daw Khe Kyaing, Daw Nye Chawm, Daw Pam Sawm leh Mah Leng Kui teng kihel uh cih kiza hi. Hoilu khua kisiatna ah Sangin leh akim a pam teng nak siat pha diak ci hi. Vanleng bomb khiatna hangin a liam tam mahmah ahih manin, misi kibehlap thei lai ding lamet huai ci-in khuami khatin gen hi.
Weilu khua pen Chin State leitaw lam Matupi khuapi pan Tai 50 gamlatna Matupi leh Paletwa kikal ah om hi a, 2014 kum misimna sazian ah khuami vekpi 500 kim leh Inn 80 apha khuaneu khat ahi hi. Weilu khuaneu pen Mipi galkap (PDF) pawlte tenna ahih loh banah SAC galkapte zongin Phualsatna (Camp) a neihlohna khuano khat ahi hi. Tua bek tham loin khatvei bek zong gal kikapna cihte zong a om ngeilohna mun leh khua khat ahi hi ci-in khuami khatin Tongsan Media tungah genkhia hi.
Hits: 9