Zogam, Tedim Township, Tungzang khua ah ZRA (Eastern Command) galkap te’n thu le la bang mah gen loin, inntekpa Pa Khai Khen Mang (Kum 76) pen vua gawp / satgawp uh cih thu Tungzang khuami khatin gen hi. Thu pianzia tawh kisai khuami khatin a genna ah, ” Abeisa June 2, 2024 nitak khuamial khit hun pawl hi in, ZRA (Eastern Command) galkap 2, pen Pa Mang’ inn sungah lut uh a, bang mah thugen zong om loin Pa Mang kaikhia pah uh hi. A huan khang lampi laizang ah vua ngekngek uh ahih manin, Vok gawh bangin Hawk peupeu himai veh aw! A Innkuanpih a zi a tate zong lau in a taimang uh hi lai-in, mulkim huai lua himai” ci-in a kim nai pan a za khuami khatin genkhia hi.
Pa Mang pen ZRA (Eastern Command) te’n a si lian dingin a bawl uh ahih manin, a vuakna mun huankhang lampi tungah sisan naisan tawh nusiat uh ci hi. A sawt loin Innkuanpihte leh veng leh pamte’n delh pah uh a, khua phawk nawnlo sa in Inn sungah puato uh ci hi. A lutang, a maitang khempeuh sisan tawh kidim bek tham loin, nak liam lua ahih manin, etthei dinmun hi nawn lo ci hi. A mittang lang khat kitam / thepcip pahin sisan leh tui bekbek luang ci hi.
Tedim zato kipuak theilo ahih banah cihna ding kitheilo ahih manin, Tungzang Zato siamahte’n abawl theih bangin bawl uh a, zan thapai kikoih cip mai ci hi. A zingsang ciangin beh makaite in Suangsang lam a om ZRA Thudotpi / thukanpi Sia Mang hopih in, thu pianzia teng genkhia uh ci hi. Sia Mang in a dawnna ah, ” ZRA te hi loin ko, Suangsang khuami zukham khangnote hi-in, ami zong thei khin ing” ci-in dawng ci hi. A hi zongin Pa Khai Khen Mang zi leh tate in bel a Pa uh a vuate ii mel leh puam, a tha puakzia, a talkolh pian, thatom cihte akipan kiciantak thei sitset man uh ci hi.
Pa Khai Khen Mang pen a zingsang ciangin Mizoram, Champhai lamah zato kipuak suak pah ci hi. Zomite ei leh ei sanggam laizom khat sungah hih bang liang ngongtat / gamtatna i neih mawk pen a thuakte bek hi loin, hong bawl Pasian a lung akim mah diam? ci-in, Tungzang khuamite’n thungetna leh kamtam lawhna nei uh cih kiza hi.
Pa Khai Khen Mang pen Champhai zato ah hoih lam manawh nai hetlo in, lamet huai nawnlo phial dimnun ah om cih kiza ahih manin, a kua maciat in thungetna leh akitangsap uh sum leh pai tawh panpih huai mahmah cih kiza hi. Hih ngongtat nasem ZRA te in a bang thubulpi tawh Puteek khat hih zahtak bawlsia uh cih thu a sawt loin thuman, thutak kithei khia veve ding hi ci-in, meltheih sanggamte leh khuapih tuipihten gen uh cih kiza hi.
Ref: Tungzang khuamite
![](https://tongsan.org/wp-content/uploads/2024/06/73321493_2690880704296352_3589854650930561024_n.jpg)
Hits: 9