A sawt nai lo nung kal sung in CNA leh ZRA-EC te Tedim gam sungah kidona a hang bulpi pen Constitution leh Zogam Charter kibatloh buaina hang hi loin, Minam kikal buaina hang zong hi lo hi. Ukna buluh (SAC) ado/ a langpan CNA leh CDFs te’ lampi-ah ZRA in mine koih / siah in a kapna hangin CNA leh a pawlpihte’n a kap kikna hangin kidona a piang ahi hi.

A kipatna pan en hi le’ng abeisa 2021 February 1, ni in (SAC) in Ukna hong suhkhiat ciangin, Kawlgambup mipite kilungkim loin gambup lungphona kinei hi. Tua lungphona bek tawh piangthei lo ahih manin, thau kitawi in SAC kidona leh kapna kipankhia hi. Chin State-ah zong township min, mun min leh minam min tawh CDFs cih kiphuanin thau kitawi a, ukna buluh (SAC) galkapte kilangpan ziahziah hi. Tua bangin akidinkhiatna ah CNA leh ZRA kilamdanna om pah hi. CNA in CDFs maipha pia hin, a hih theih zahin training neih pih hi. Pawlkhatte training kahman na leng sikh sak lai hi. A lem bangbang in galvan zong pia lai hi. CDFs leh CNA in gal dokhawm uh hi.

Ahi zongin ZRA ahih leh tua danin gamta, kalsuanlo bek tham loin, CDF-Hualngo, PDF Zoland, PDA te’ galphualte busim in, hal sakin nek theih tuamtuam zong laksak bek tham loin, a galkap tangvalte mahmah manin vua gawp lai uh hi. Tua banah Ukna buluh (SAC) te tawh kipawl hi, ci-in kigen sipsip hi. ZRA in SAC te dolo bek tham loin, ” Ko mun leh gam ahi Zogam ahi Tedim Township, Tonzang township, Cikha, Khaikam cihte ah ko, ZRA cih loh a dang thautawi kipawlna om thei lo ding” ci uh hi. Tua manin SAC a dote tuni dong mahin nawngkai sak thapai pah uh hi.

Tua hi a, Chin State sunga Local CDFs kipawlkhopna ahi CJDC in ZRA nasepte langpan ngitnget ahihna thu abeisa 2022 kumin tangkona nei uh hi. Tua bek tham loin, kidona tawh dan piak ciang dongin koih ta uh hi. Chin State sung a om mipite’ theih dingin ZRA cih pen India gam Manipur State ah minam hamphatna deihin India kumpi a langpang thautawi kipawlna hi a, India kumpi tawh kilemna /thukimna bawl khin uh hi. India kumpi phalna tawh ZRA pen Indiate’ gamcing thau tawi kipawlna khatin koih in, khasum pia uh hi.

Myanmar kumpite tawh zong kilangpan den uh a, minam thautawi dangte tawh zong kipawlkhawm theilo hi. Myanmar gam President lui U Thein Sein tawh kilemna a bawlkhawm mualmi thautawi pawlte’ sungah ZRA kihello hi. Chin State sung a om CDFs / PDFs kipawlnate te tawh zong kipawlna neilo hi. Tedim, Tonzang leh Kalay Kabaw sung-aa CNDFs, KKG, PDF-Zoland, PDA cihte tawh zong kipawllo hi.

CNA ahih leh Local CDFs (17), kipawlna 2020 kiteelna-ah တ္ေတာ္ကိုယ္စလွယ္te tawh kipawlin Chinland Council, Chinland Government ah ကာကြယ္ေရးဝန္ႀကီး mun la uh a, Chinland kepbitna, Chin mite humbitna, hong langpangte langpan in ado kipawlna ahi hi. K3C ah kihelin galvai-ah mapang bek tham loin, NUG tawh zong kipawl hi. Minam thautawite tawh zong kipawlkhawm hi.

Tua banah UNO pan Mandate a ngah kipawlna khat zong ahi hi. Myanmar Government, Myanmar galkapte in zong Chin Minam Galkap kician khatin ciamteh hi. Amerian kumpi in zong Chin galkap makai leh minam makaite zong sam ngei a, tu laitak mahmah in zong, kihona nei khawm den uh hi. CNA ah Chind State sung leh a pua township tuamtuam, mun tuamtuam pan khangnote kihel ciat hi.

Source: CBN Daily News

Hits: 3

Byadmin

Leave a Reply

Your email address will not be published. Required fields are marked *