Zomite’ sungah minam min pua Political Party khat ahi Zomi Congress for Democracy (ZCD) pianni leh Kum 34 cin phawkna (ZCD Birthday & Anniversary) pen Yangon khuapi, Bo Aung Kyaw Street, Pale Kywe Restaurant ah thupitak kibawl cih kiza hi.

ZCD pen abeisa 1988 kum gambup buaina (8888 Revolution) khit phetin political party phuattheihna kong khak akihon ciangin, tua hunlai a khuamu zawdeuh India gam Bombay (Mumbai), Kalkatta khuapite ah Zomi sumbawl pawlkhat leh Pu Thang Lian Pau (tu’n ZRO/ZRA president) te’ hanciamna tawh ZNC party na phuan khia uh a, 1989 kum October 24 ni in kumpite’ theihpihna (matpongtin)na ngah khia uh hi. Makai dingin Pu Col Khen Za Moong zong na zawn uh masa uh a, a lem theihloh ciang in Pu Cin Sian Thang cial uh hi.

1990 kum kiteelpina ah ZNC min tawh dem uh a, Tonzang pan in Pu Thang Lian Pau in MP kuanglui in gualzawhna ngah in, Tedim pan Pu Cin Sian Thang in MP Kuanglui in gualzawhna ngah uh hi. Ahi zongin galkapte in ukna buluh uh ahih manin, a gualzo Party te in kumpi sem theilo / thuneihna a neih theih nawnloh ciangin, Pu Thang Lian Pau in thautawi lampi zui dingin gampua / India gam lamah taikhia a, Pu Cin Sian Thang in Thau tawilo (non-violence) lampi zui hi. Tua bangin thuman (Democracy) deihna tawh galkap kumpite a dona hangin, Pu Chin Sian Thang in tamveipi mat le hen thuak bek tham loin, Thong sung leh a innah kikhumcip kum sawtpi thuak lawh hi.

ZNC sihna leh ZCD Pian Khiatna:

Kawl galkap kumpi SPDC in abeisa 2010 kum in kiteelna a bawl uh ciangin, alangpang party teng kiteelna ah kihel nuam loin, nuak san uh a, tua a nuak party te Matpongtin zong kiphiatsak suak hi. hi. Tua a nuakte lak ah ZNC zong kihel ahih manin, ZNC Matpongtin zong a si suak hi. Ahi zongin 2010 kum kitelna tungtawn in U Thein Sein kumpi hong kah hi. Anuak pawlte’ sungah makai Daw ASSK leh U Thein Sein hong kiho thei ahih man in party sisa teng matpong tin bawl kik theihna lampi hong kihong hi.

Zomi Min Nial Zolo Uh:

ZNC matpongtin bawl dingin akithawi ciang un thunei te’n ” Kawlgam sungah Zomi cih bang om kei” na cih san hiau uh ahih man in cihna ding theilo in om uh hi. Pu Cin Sian Thang in tualaitak a Tedim Association makai Prof. Dr. C. Thang Za Tuan @S iapi Tuanno na kokha bilbel hi. Sia Tuanno, facebook: ThangTuan Ngalliam makai in Kawl te’ tangthubute pheklek uh a, Kawlte’ Encyclopedia laibupi sung nangawn vuah “Chin te amau leh amau Zomi kici uh hi” cih khawng na om dimdem ahih manin, tua thu teng bulphuh in laipi khat a phah khiat uh ciang un, Kawl galkap thunei te’n nialzo nawnlo in “Zomi om mah uh cei” cikik uh hi. Tua tungtawn in Zomi party kiphuan thei kik a, ZNC pan ZCD ah a kilaih ahi hi.

ZCD Min Tawh Meekuang Lui Kipankik:

2015 kum Kiteelpi ciangin ZCD in Tedim, Tonzang mahah Meekuang lui uh a, Zomibup kipumkhatna tawh mun 5 ah gualzawhna ngah hi. Tua tungtawn in Pu Chin Sian Thang, Pu Gin Kam Lian, Pu Pau Lun Min Thang, Pu Kham Khan Thang, Pu Thang Khup, Pi Cing Ngaih Mang cihte in ZCD min tawh Central Parliament leh State parliamente ah panmun lenin gam makaihna sungah kihelthei uh hi. Tua hun sungin ZCD min tawh Zogam sungah lampi, sanginn, Gunlei, cidamna lam leh biakna lam cihte dongah khantohna leh hamphatna tampi kingah lawh hi.

Tua banah 2020 Kitelna ah ZCD min tawh Tedim, Tonzang leh Kalaymyo cihte ah kidem leuleu in, Tedim pan a ngah loh hangin Tonzang pan Pu Pau Lun Min Thang leh Pi Cing Deih Mang in gualzawhna ngah uh hi. Ahi zongin Kawl galkapte mahin 2021 February 1, ni-in Kawl galkap makaipi Min Aung Hlaing in a gualzo NLD leh a pawlte Kumpi sepsak man loin, kumpi thuneihna sutkhia hi. Tua ni akipan Kawlgam buppi ah kidona leh kikapna piangin, tuni ciang dong sihna manna tawh kidim in leitungbup ah minthang hi.

Hong tung ding 2024 kumah kiteelna neih kik dingin Ukna buluh (SAC) te’n genkhia khin uh a, NLD akipan party honpi khat kihello (Nuak) phot ding uh hi. Ahi zongin ZCD bel tutung nuak sawm nawnlo uh himah leh theihpihna Matpongtin ngah zo nailo cih kiza hi.

ZNC / ZCD Kum 35 Cing ta:

ZNC/ZCD kum 35 a cing hita a, hih hun sung khempeuh lungkia loin a pang tinten makaipi Pu Chin Sian Thang in hong nusiat khit hangin, a kipat pan tuni dong mah a dinpih tinten Pu Gin Kam Lian makaihna tawh October 25, 2023 ni-in ZNC /ZCD Kum 35 cin lungdamkohna leh thungetna Yangon khuapi, Pale Kywe Restaurant, Bo Aung Kyaw Street ah thupitak kinei cih thu Pu Mung Laan Thang,in Tongsan Media tnute tungah gen hi. A nunung pen ZNC / ZCD kum 31 cin Lungdamkohna zong abeisa October 23, 2019 ni-in Tedim khuapi, Cope Centennial Jubille Hall ah makaipi Pu Chin Sian Thang dam lai in thupitak kibawl ngei cih kiza hi.

Hits: 7

Byadmin

Leave a Reply

Your email address will not be published. Required fields are marked *