October 3, 2023 || Tongsan Media Group ||
Sagaing Division, Ayartaw le Debayin township ah ukna buluh SAC leh Burma National Revolutionary Army (BNRA) te kikap uh a, SAC galkapte 19 kim si-in BNRA ten thau lawng thum ngah uh ci-in BNRA thugenpi khatin pulakkhia hi. October 1, 2023 ni zing lam (09:00am) hun pawlin Ayartaw khuapi Chitawyar pagoda gei-ah phual sat SAC battalion No. 5004 te pen Burma National Revolutionary Army (BNRA) te’n va kap uh a, SAC galkapte 4 si-in, thau lawng 2, MA-1 lawng 1 leh thauvui thautang pawlkhat ngah uh ci hi.
SAC galkap lam pan Tenk Car 1, tawh kap kawikawi uh a, ahi hangin mipi kem galkap (BNRA) pawlte hoihtak nungkik thei uh ci hi. Abeisa September 30 ni nitak lam (4:45Pm) hunin zong Sagaing Division, Debayin Myoma galphual pan a paikhia galkap 100 kimte BNRA No. 1, Yadanar theinnga khawk te tawh nai khat val sung kikapna nei-in, SAC galkapte 15 kim si, ci hi.
SAC galkapte 100 kim galkuan pawlte Debayin khuapi huam Pyankya khua leh Hpa yar htut khua kikal ah BNRA No. 1 Yadanartheinga Teamte makai-in Shwebo District battalion 12 leh tualsung mipi kemcing thau tawi pawl tawh kikap uh a, SAC galkapte 15 sang tamzaw si in, 10 sang atawm zawlo in liamna ngah ci hi. Tua khit (5: 50Pm) hunin, SAC galkapte’n Mi-35 gal vanleng tawh gal huh uh a, ahi zongin BNRA le mipi kemcing thau tawi pawlte buaina omlo in, nungkik thei uh ci hi.
Ngongtat SAC galkap pawl in gal kuanna lam dung a om Nambehla khuami Ko Moe Nyo pen October 2 ni-in Bagan khua gei-ah manin that hi. A beisa kal sungin zong Lettee khua sung nasiatak susia uh a, Hmanthar khuami Ko Naing Lin a ngawng, a khut leh a khete tansak banah that lumin adang mi 2 zong man uh ci hi.
A beisa September 27 ni-in SAC galkapte gal kuanna hangin Debayin khuapi huam pan mimal 15000 valte guahzu lakah gal tai uh a, tuni dong inn ciah thei nai lo uh ci hi. Amaute ading nek le-dawn le zatui zaha kitangsam pha mahmah, ci-in Dongtuak huh kipawlna pan vaisaipi Ko Gyi Pyu in genkhia hi.
Source: Khit Thit Media
Translated: Tongsan Admin Team
Hits: 5