October 3, 2023 || Tongsan Media Group ||
Mipi kipawlna group 3 te’n CDF – Mindat te’ ading galvan AK-47 lawng 40, Thau tang leh a koihna bucing takin piakhia uh a, Rifile pawl khat zong piak beh lai ding cih thu International Mindat K’ Cho Organization (IMCO) te’n Ocyober 2, 2023 ni in pulakkhia uh hi. CDF- Mindat te ading AK-47 lawng 40, thau tang 12000, Thautang koihna bu 120, cih teng abeisa September 28, 2023 ni-in, CDF- Mindatte’ galphualpi ah International Mindat K’Cho Organization (IMCO), Heal the World leh CEA (Norway) te kipawl khawmin galvante piakkhiatna nei uh hi.
Hih Civil Society ahi IMCO te’n CDF- Mindat te AK- 47 thau lawng 50 piakkhiat ding geelna pen abeisa 2022 June kha sung akipan hi-in, Thau lawng 50, Thau tang 15000, a koihna bawm mal 150 cih teng piakkhiat zawhna dingin US$ 180000 man dingin genkhia uh hi.
International Mindat K’ Cho Organization – IMCO ah President Salai Thang Seng Ling in agenna ah, ” Ko, kiang ah Spring Revolution akipat masakna pen leh PDF galkap zong akipan masakna pen mun ahih mah bangin, Spring Revolution akipat cilin zong CDF – Mindat pan galkapte a si tam penna ahi hi. A hang pen ko lamah Zothau bek tawh gal kido / kikap ahih manin, hih bangin galkap Thaute akitawisak zawhna ding ngimna lianpi kinei hi. Kipawlna khempeuh in nasiatak kihanciam hi. Ahi zongin Revolution kipat cil lamin kizopna lam akipan kisapna / thanemnate’ hangin galvan lam hoihtak kipiakhia zolo suak hi.
Tua manin 2022 June kha sungin, ko NGO kipawlna makaite Meeing pan khensatna nei-in, galkap Thaute lawng 50, thautang 15000, Thautang bawm mal 150 cih teng tawh kipankhia hi. Hih Project ading in NUG Defense Ministry nuai pan vaipuak neite tawh kizopna nei- in, amau NUG huhna tawh US$ 185000 tawh project kipankhia thei hi “ ci-in genkhia hi.
Project a val teng pen AK-47 Lawng 10, Thautang 3000, Thautang bawm 30 cihte zong CDF – Mindat pawlte’ tungah a sawt loin, piakkhiat kik ding geelna om ci hi. Tua Project ading zong kam-etna ( Lucky Draw) zuakna tawh sumbul zonna kinei-in, US$ 70000 val kingah khin in, Dr. Nyein makaih Heal The World leh CEA (Norway) pan US$ 35000 val tawh huh uh cih kiza hi.
” I deihna bulpi ah gamlak a om Thau tawi naupangte’ lungkiatna ding peuh mah genlo / seploh ding thupi cih hipen mai hi. Hih Revolution pen Kawlgam buppi mipi khempeuh pumkhat sakhat suakin a mapankhop ding uh kisam pen hi. Tutung Revolution i mualsuah zawhna dingin, Kawlmi mualmi Thau tawi kipawlna khempeuh pumkhat suakin, mapankhop ding kisam lua ta ee. Hih bang a mapankhopna dingin CDF – Mindat zong thatang leh galvante mah tawh mapang theihna ding uh deihna bulpi tawh kipanpih nuam ahi hi. Tutung bek hi loin, a maban om laite zongah panpihna leh huhzawhna ding geelna kinei toto lai” ci-in Salai Thang Sein Ling in genbeh hi.
Chin State, Mindat Township ah abeisa September 2023 sung bekbek in, Ukna buluh (SAC)te leh CDF – Mindat kikal ah kikapna 5 vei om a, tua sungah SAC galkapte 4 si-in, 9 liam uh hi. CDF – Mindat lam pan 1 si-in, 1 liam cih CDF – Mindat thugenpi ten pulakkhia uh hi. Mindat khuapi sungah SAC te pen CDF- Mindat te’n sikha galsim zia vive tawh do uh ahih manin, SAC galkapte’n cihna ding theilo uh ahihna tawh Mindat khua mite manin, thusitna leh dotna nasiatak bawl semsem uh ci hi.
Source: People’s Spring
Translated: Tongsan Admin Team
Hits: 5