Rakhine State, Maungdaw township ah Arakan Army (AA) leh SAC galkapte kikalna hangin, guallel in Bangladesh gamah galtai SAC khut nuai a nasemte leh SAC galkap vekpi gawm 230 val ta uh cih Bangladesh Media in pulakkhia uh hi.

Tulaitak ciangciang Myanmar gam lam pan galtai SAC galkapte in a galvan (Thau)te kepcip sak uh a, tawmvei sung bukna / khawlna ding munah Bangladesh kumpi in puak uh ci hi. Tuni February 6, 2024 ni-in zong Myanmar gamgi cing (border police) 7, bangladesh gam sungah lut beh lai uh hi. Guallel a galtai SAC galkapte hon khat zong kihel uh a, amaute pen gamgi ciangtanlo Siavuan kipawlna (Doctor of Without Border (MSF) te leh NGOs kipawlna dangten zatui, zaha tawh bawl uh cih kiza hi.

Hih gamgi ciangtanlo Siavuan Kipawlna (Doctor of Without Border-MSF) te in February 4-6 sung SAC galkap 25 te zatui zaha tawh bawl uh a, amau tawh kisai gamdang mite bawlna Zato ah puak sawn uh hi. A nuam tuam zawdeuhte Zato puak nawnlo in, amau tawh kisai zum lamah puak uh ci hi. Tulaitak kikapna mun ahi Myanmar leh Bangladesh gamgi a om Sanginn 5 te zong kikhakcip phot in, khuamite zong mun muanhuaina ah kituahkhia dingin Bangladesh kumpi in mipite zaksakna nei uh hi.

Tua banah kikapna hangin Myanmar gam lam pan Bangladesh gam lamah Thautang khak Bangladesh gammi numeite leh Rohingya khat tawh kigawm mi 2 si ci hi. Myanmar galkapte Bangladesh gam lamah a taikhiatna ah SAC nasem Ambassador Mr. Aung Kyaw Moe pen Bangladesh State Guest House ah samin lungphona / vau hilhna lai pia uh cih thu Bangladesh Ministry of Foreign Affair, Director of General Mr. Mia Mohammad Mainul Kabir in genkhia hi.

Hits: 13

Byadmin

Leave a Reply

Your email address will not be published. Required fields are marked *