Ukna buluh makaipipa Min Aung Hliag makai-in Chin State sung a om Chin minamte leh a diakdiak in Christiante nasiatak a bawlsiatna hangin, Chin minam ahi Hakha leh Thantlang kampau mi 5 in, thubul kiciantak tawh Philippines gam thukhen mangpite cialin, Philippine thukhen zumpi ah thubawl / khia uh cih kiza hi.

Philippines Lawyer Mr. Romel Bagres in “Hih dan thu tawh kisai Philippines gam thukhen zumah hong kikhia masa penpen hi-in, Philippines thukhun zong tawh kituak bek tham loin, International thukhen zumpi dong ah kitunto thei lai hi’’ ci-in gen hi.

Abeisa 2021 September kha sungin ukna buluh (SAC) galkapte in Thantlang khuapi ah Pastor 1 leh pawlpi upa 2 te thu om lopi in thatlum uh a, a sawmna tuam vilvel tawh Biakinn 10 val haltum uh hi. Tua bek tham loin, 2021 August pan 2022 September kikal sungin Thantlang khuapi ah inn 100 val haltum in vut leh vai suah uh cih thubul teng pansan in, Philippine thukhen zumpi ah a khia uh ahi hi. Tua a khiat uh mite pen adiakdiak in Ukna buluh (SAC) makaipi Min AungHlaing leh SAC galkap sem laitak leh asem ngei ulian mi 9te banah tulaitak Chin State ah Chief Minister Dr. Vung Suan Thang zong kihel hi.

Hih Chin minam mi 5 teng pen Australia, UK (England), Canada leh India gamte ah teng uh hi-in, Philippine gam thukhen zumah a khiat uh mi 10te thu tawh kisai Philippine thukhen zumpi in thusit theih ding khensatna a neih leh SAC thuneipi (or) Myanmar Embassy tungtawn in sapna kipuak thei ding ci-in Lawyer in genkhia hi.

“Tuni pen tangthu thak pian ni hi a, Philippine gammite leh ASEAN gamte kipumkhatna leh thukimpihna tawh Myanmar gammite’ thuakna, kibawlsiatnate ah thuman thutak leh gualzawhna kingah hamtang ding lametna ka nei uh hi “ ci-in, Chin makai mi 5 te’ sung akihel Salai Len in Manila khuapi Thuthak sai (Journalist) te kiangah genkhia hi.

Hits: 12

Byadmin

Leave a Reply

Your email address will not be published. Required fields are marked *