September 22, 2023 || Tongsan Media Group ||
Sagaing Division, Menkin township Chindwin gunpi mun khatah abeisa September 19, 2023 ni zingsang lam (11:00am) hun pawlin, khualzin mi 150 val tuanna SAC galkapte’ galvan leh vankham pawl khat pua SAC te’ Gunkuangpi (Motor boat) khat tumin,September 21 nitak lam ciangciang misi luang vekpi gawm 20 kim bek kimukhia pan cih khuamite’ tungtawn in kizasawn hi. Gunkuangpi (Motor boat) pen Chindwin gun leilu lam pan Monywa lam manawh in a tuaksuk hi a, Menkin khuapi huam Hmawkataw khuaneu gei ah Suangpi khat phu kha a, tumnih kisuah in a tum cih thu Menkin Township PDF galkap makai Ko Nyo Gyi in gen hi.
“Gunkuangpi (Motor boat) pen zingsang nai 11:00am kim a tum hi. Hmawkataw khuaneu kiangah Suangpi khat phu kha a, Gunkuangpi kitam in tumnih kisuah a tum himai ” ci-in Menkin PDF makai Ko Nyo in genbeh hi. Gunkuang tungah SAC galkap 30 kim, Pyusawhtee honkhat, Non CDM Sang sia/ siamah, Monywa University ah sangkah ding Sangnaupangte leh midang hon khat kihel uh ci hi.
Gunkuang tuahsiat laitak in Nupi khat lengkhia / zuan khia man ahih manin, a mah bek suakta hipah a, adangte khempeuh tupi sungah tummang uh hi. SAC galkapte leh tua kim a om Pyusawhtee te kipawlin Gunkuang 7 tawh misi luangte zongsan mahmah uh ci hi. “Misi luangte tui tungah akidawktoh / lamto ding bek ngak thapai uh a, ahi zongin tu ciangciang misi luang kimubeh nailo hi” ci-in khuamite’n genbeh hi.
Ukna buluh (SAC) galkapte’ Tembaw 12 kizui khawm hi a, Homalin khuapi pan dingkhia in Suang meihol, Suang eng (suang manpha) cihte zong pua ci hi. September 18, 2023 nitak lamin Minken khuapi, Panset khua ah zangiak uh a, a zingciang September 19, 2023 ni apaikhia ding akithawi Chindwin gunpi sungah tum ci hi. ” Panset khua Pyusawhtee te’ khua pan a din khiat khit a sawt loin, Gunpi sungah Suangpi khat phukha in, a tumsuk hi mai ” ci hi.
” Gunkuang / Tembaw in Suangmeihol, Suang eng (suang mangpha)te khempeuh Chindwin gunpi sungah tum mang khin ” ci-in Kani khuamite’n gen uh hi. Tua banah hih galkapte’ Tembawte pen abeisa July kha sung Monywa, Salingyi, Yinmapin, Kani, Minken , Kalaywa, Hmawlaik, Phaungpin leh Homalin khuapite ah a zin hi-in, a ciahkik lamah tuahsia cih kiza hi.
Hits: 4