June 22, 2023 || Tongsan Media Group ||
Kuki-Zomite pen India gam, Manipur State (Churachandpur) ah mun leh gam nei, minam kician khatin Pute pate’ hun akipan tuni ciang dong India kumpi in a theih / ciapteh minam khat ahi hi. Ahi zongin Manipur State sungah nam lian (or) mimal tam pen ahi Meitei te’n Kuki leh Zomite a khangkhang in simmawh, bawlsia, nengniam tawntung uh hi. Tua bang teng kawmkal pan abeisa May 3, 2023 ni-in Meitei te’n Kuki – Zomi / Zosuante hong do / gal le sa bangin bawlin tampi hong that khin bek tham loin, inn leh lote mei tawh haltum sak uh hi.
Hih buaina tawh kisai in, Sialpi guah thuak bangin kithuak zolo ding banah India kumpi leh leitung buppi in hong theihpih a, India gamah gam leh lei kician nei-in, ei leh ei suaktatak ki-uk theihna ding (Seperation Administration) ngimna tawh abeisa May 17-18, 2023 sung Joint MLA, Innpi leh CSO te’ makai in Mizoram, Aizawl khuapi ah Meeting thupi tak nei uh cih kiza hi.
Hih meeting tungtawn in maban kalsuanzia ding tawh kisai Tanu sem ding /vaipuak nei ding Makai pawl “Core Committee on Separate Administration- CCSA) phuhkhiat ding geelna nei uh ci hi. Hih vaipua makai kiteelna dingah Kuki Innpi Manipur (KIM), Zomi Council (ZC) leh ITLF pan palai nih ciat sawl dingin thukimna nei uh ci hi. Tua akisawl palai ten May 28, 2023ni-in Aizawl ah meeting nei kik uh a, tua panin “Core Committee on Separate Administration” phuhkhia thei bek tham loin, Interim Chairman leh Secretary te sehkholhna nei pah uh ci hi.
Tua banah hih makaite nasep a kipattheihna dingin Aizawl ah Liaison Office hon dingin hoihsa uh a, Liaison Officer dingte zong teelkhia pah uh ci hi. Kuki Innpi Manipur (KIM), Zomi Council (ZC), Hmar Inpui, Mizo People Convention (MPC) leh ITLF pan palai nih ciat kiteel uh a, tuate in June 2, 2023 zingsang (11:00am) hunin Mini Auditorium, Dorcas Hall, New Lamka ah Expansion and Induction Programme nei uh ci hi. Executive Body khat bawlkhia thei bek tham loin, anuai abang in vaipuak / panmun kiteelna zong nei thei pah uh cih kiza hi.
Executive Committee:
Chairman – Suominthang Doungel
Vice Chairman – Hauneilal Vaiphei
Vice Chairman (External) – Upa R. Tawna Khawbung
General Secretary – Thangbiaklian Hangzo
Financial Secretary – S. Lianbawi Vaiphei
Tresurer – S. Ngaineikim
Information and Public Relation – Golan Suanzamung Naulak
Executive Members:
Rev. Dr. V. Lalnghakthang
Lalrinlien Joute
H. Mangcinkhup
Ex-Officio Members:
Hmar Inpui
Kuki Innpi Manipur (KIM)
Zomi Council
Mizo Peoples Convention leh
ITLF (Indigenous Tribal Leaders Forum) pan member nih ciat.
Core Committee on Separate Administration, Expansion leh Portfolio kihawm zawh ciangin Pastor MT Khanlal Guite (Local Pastor of EBCC Hebron) in makai thakte Topa’ tungah apna leh thupha piakna nei hi. Core Committee on Separate Administration (CCSA) in Regional Office munli ah kihong dinga, tuate ahih leh Lamka, Pherzawl, Kanggui, Chandel, Tengnoupal, Va-ngai, Jiribam leh Tamenglong sung pan teelkhiat hi ding ci hi. Core Committee on Separate Administration in join MLA, Innpi, CSO leh kipawlna tuamtuam te tawh kithuza in nasem khawm ding uh hi. Mipi ten thapia siam ciat ding leh thungetna tawh mapanpih dingin cialna nei uh cih kiza hi.
Reported by: Sawm Thomte (Tongsan Reporter, India)
Posted: Tongsan Media Admin Team
Hits: 13