June 27, 2023 || Tongsan Media Group ||
Tu laitak leitung thuthang (World news) khempeuh sungah akilunglut mahmah khat ahi Titan Submarine tuahsiatna tawh kisai a tangthu tawmno khat Tongsan Media pan hong gelhkhia ung. TITAN Submarine i cih bang ahiam? Abeisa 1912 kumin a minthang mahmah Titanic Tembawpi kici khat Pacific tuipi sungah tumin, a kiatna tui taw ah a luanghawm tuni dong lum dipdep in om lai kici hi.
Tembawpi minthang mahmah khat ahih zahin mipil mihau tampi in lunglut in, tuipi taw ah a va en nuam tam mahmah uh ci hi. Tua tembawpi en nuamte’ tuanna /puakna dinga kibawl tembawno cileng kikhiallo ding hi. A tomin gen lai leng tui sung lutthei khualzinna tembawno cileng zong kikhial tuanlo kha ding hi. Hih banga lawm leh gualte tawh kithalawpsuah kigualnopsuah a khualzin gamvakna namte pen EXPEDITION kici a, Tuitaw a om Titanic Tembawpi luanghawm mu nuam /en nuam a cimphawng khualzinna ahih manin, Titanic Expedition kici pah hi.
OceanGate Company te in tuipi taw a om Titanic luanghawmpi etna ding a tuampian vilvel, mihing 5 pua thei dingin abawl TITAN SUBMARINE/SUBMERSIBLE ci-in min vawh uh hi. Hih tembawno TITAN SUBMARINE pen a sauna pi 22, hi a, tuipi taw meter 4000 (pi 13,120) ciang a lutsuk thei dingin kibawl ahihi. Titanic tembawpi luanghawm pen Pacific tuitaw meters 3,800 (pi 12,500) athuk tuitaw ah om kici hi. A sunga tuang mite dik ding a kibawl Oxygen zong nai 96 sung kikhom dinga kithun ahi hi.
June 25, 2023 (Sunday) ni-in mihau 5 te kipawlin tuipi taw a om Titanic tembawpi en dingin hih TITAN Submarine tembawno tawh kuankhia uh a, nai khat val deuh apaikhit uh teh tuipi tung a om akizopna uh Tembawpi tawh kizopna kitat in, a tun a banna mel kitheizo nawn loin mangcip hi. Tua amancip lam akitheih akipan US tuipi lam cingte leh Canada tembaw lam siamte akipan tuipi sung lam theite in puakkham hi dingin ummawh uh hi. Tua bang a upmawhnate’ tungtawn in tuni June 26, 2023 ni-in asung lam puakkhap (imploded) hi-in, a themneng nonote kimu ta hi ci-in US Coast Guard-te in tangkokhia uh hi.
Koi lai ah Kimu:
Leitung gam tuamtuam Navy-te leh US Navy-te in nipi kal khat sung phial ding khawng Pacific tuilu-tuitaw phek lekin a zon khit nung un, Pacific tuipi taw, Titanic tembawpi luanghawm omna (Titanic Wreck) mun pan pi 1600ft kim a gamlatna munah Titan Submarine tembaw kitam them 5 (five debris /parts) mukhia uh hi. Tua Titan tembawno a keh themno a muhna tungtawn un, Tembawno pen asung lam puakkham (catastrophic implosion) hi ding hi ci-in, Mr. Rear Adam John Mauger in tangko khia hi. A sung a tuang mi 5 te zong nuntak gim nam nawn lo bek tham loin, a luang abante zong kimu kik ding lametna omzo nawnlo ci-in gen hi.
A si a mang teng:
1) Stockton Rush: Amah pen hih tembawno (Titan submarine) abawl OceanGate Company, nei pa leh CEO hi a, hih tembawno a hawlpa zong hipah hi.
2) Hamish Harding: British sumbawl mihau (British businessman) khat ahi hi.
3) & 4) Shahzada Dawood leh a tapa Suleman: Pakistan sumbawl mihau mahmahte pata ahi hi. (Pakistani investor)
5) Paul-Henri: Amah pen Piantit (france) gammi tui lut siam (French diver) mahmah khat hi a, sawltak tangzang dinga a tawnpih uh ahi hi.
Source: Reuters,
Translated: Zonupa (Tongsan Translator)
Hits: 13