Chin State, Falam khuapi huam Tibual khua sung a om ukna buluh (SAC) gal phual pen tuni November 15, 2023 ni zingsang lamin Chin National Defense Force (CNDF) pawlin busim in lakhia zo uh ci-in, CNO / CNDF thugenpi in pulakkhia hi. November 15 ni zingsang tung (04:00am) hun pawlin busim kipan uh a, (05:00am) hunin SAC galphual lakhia zo bek tham loin, Camp buppi mei tawh haltum uh ci hi. SAC galkap 2 si-in 30 valte India gam lamah tai mang uh cih kiza hi.
“Zingsang tung khuavak ma-in busim in nasiatak kikap ung! SAC galkap a silo sun teng a vekpi phial un tai kekin nung zuih lai ung. Galvan tawh kisai bel mal tuazah kingah cihte akician in gencian thei nai kei ung” ci-in CNDF thugenpi Salai Cung Ngai in pulak hi. A taimang SAC galkap 30 valte India – Myanmar gamgi Vaphai khua a om India galkap Assam Rifle te a huh / a honkhia dingin a baihsa in om uh ci hi.
Hih Tibual SAC Camp busimna tawh kisai in CNDF pawlte bek ii lakkhiat hi a, abeisa April 10, 2023 ni in zong Falam – Kalaymyo kikal lampi tung a om Var Camp zong CNDF in lakhia khin uh hi. Tua banah kalay township leitaw lam SAC Camp lakkhiatnate leh Tamu District Khampat Camp laknate zongah CNDF leh Tualsung PDFte kipawlin kilakhawm hi. November 13-14, ni in zong CNF /A leh CDF – Hualngo kipawlkhamte in Falam township, Rih Khawdar SAC Camp leh Ciau Camp mun 2 thakhat lakhiazo uh hi.
Hits: 5