Karenni (Kazah) State, Loikaw University sang huang sungah kibusa SAC battalion (66)te’ khut nuai a om Khah Mah Yah (425) leh Kah Mah Yah (6)te leh Karenni National Defense Force (KNDF) te November 13, 2023 ni thaipai kikap uh a, SAC te 110 si-in, galkap 32 te a galvan ciat uh tawh kipumpiak (surrender) uh bek tham loin, galvan nam kim a lom atang in ngahkhia uh cih thu Karanni National Defense Force in thusuahna nei uh hi.
Karenni State ah “1111 Operation” min tawh KNDF te in November 13 – 15, 2023 ni thum sung Loikaw University sang huang sungah SAC battalion (66) khut nuai a om (Khah Mah Yah 425), leh (Kah Mah Yah 6,) te phualsat a om SAC galkapte tawh nasiatak kikaptuah uh ci hi.
November 13 ni in kikapna kipan uh a, November 14 ni nithapai kikapna sungah SAC pawlte Battalion Commander leh Deputy Commander te nih kihel galkap vekpi 110 simai uh a, a silo teng sung pan 32 te amau Thau tawi ciat tawh KNDF tungah kipumpiak (surrender) uh cih kiza hi. Tua banah adang SAC galkap 38 hingmat uh a, galvan thaupi leh thauneu kigawm vekpi lawng 18 leh thauvui thautang tampi ngah khia uh ci hi. Galvan tawh kipumpiak SAC galkate KNDF in galmat tawh kisai thukhun om bangin maban septoh ding leh a liam a baite limtak kemin khoi uh ci hi.
Hits: 11