Gaza Strip ah Hamas leh Israel kikapna pen Nov. 24 ni akipan ni 4 sung khawl phot dingin Hamas leh Israel kikal thukimna nei uh a, Qatar Foreign Ministry zumpi in Nov. 23 ni-in thusuahna nei hi. Hih ni 4 sung kikapna tawlngak hun sungin Hamas pawlin amat uh numei leh naupang kigawm vekpi 50 te khahkhia ding uh a, Israelte in zong Palestine numei leh naupang thongkia mi 150 te khahkhiat ding langnih thukimna nei uh cih thusuahna nei uh hi.

Hih langnih kikapna khawlna ding thukimna dingin hanciamna anei America leh Egypt tungah lungdamna lianpi kinei cih thu Qatar Foreign Ministry zumpi pan pulakkhia uh hi. Tua banah ni 4 sung kikapna akhawl hun sungin mihing hehpihna leh huhna annek tuidawn, zatui leh meithau cihte a puak ding Truck Mawtawpi 200 zong Gaza Strip ah lutsak dingin Israel in pulakna nei hi.

November 24, 2023 zingsang akipan kikapna khawlsan ding a cih uh hangin, Israel Commander in Chief pen Gaza strip va pai-in, Hamas galkapte om theihna ding a upmawhna mun teng nasiatak kap ziahziah uh cih thu Palestine News te’n kipulak hi. Tua mah bangin Hamas lamte in zong missile rocket tawh kap ziahziah uh cih thu Gaza News saiten gen uh hi.

Hih bangin ni 4 sung kikapna khawlsanna ding leh numei, naupang akimante khahkhiat ding thukimna om theihna ding tawh kisai in Israel kumpi makaite’ sungah November 21, nitak lamin nasiatak kikupna nei uh a, Kumpi Ulian atamzaw thukim himah leh Israeli minister of far-right party pan Minister 3te in tua thukimna nial uh cih Israel thuthak saiten gen uh hi.

Hits: 12

Byadmin

One thought on “Gaza Strip ah Hamas leh Israel Kikapna Nov. 24, ni akipan ni (4) sung Khawl ding langnih thukimna nei uh”
  1. Hello!

    Tongsan website ah nisim thuthakte Zolai, Kawllai leh Manglai (Lai / pau nam 3) tawh kikhahkhia cih pen Zomi sung bek hi loin, Kawlte leh leitung minamdangte lak zongah angtan huai thu ahi hi.

Leave a Reply

Your email address will not be published. Required fields are marked *