Kokang region sung a om SAC galphual 2 pen tuni Nov. 23, ni-in busimin kilakhiazo leuleu cih Kokang galkap (MNDAA) thugenpi Lee Kya Win in genkhia hi. ” 1027 Operation” pen November 22, ni galdona vai tawh kisai dotna akineihna pan SAC galphual lakkhiatna thu MNDAA in thusuahna nei uh hi.
” Tuni kikapna pen Tungshan area kim teng hi-in, a mun lian bel Laukkai khuapi ii nisuahna lam gamgi teng a om SAC galphual khat kibusim in, kilakhiazo hita” Tua kim tengah Rensi kici mual khat om ee maw. Tua mualtung ah SAC Camp khat om hi. Adang munkhat ah Shan Won region Mual kitawi cih in kithei hi-in, tua mual kiang a Laung Kaung Kyaik khuaneu leh Mankan khuaneu kikal a om munteng pen a kuampi in busim in siansuahna nei ung. Tua bang a siansuahna ka neih laitak un, SAC ii tawmvei galphualsatna mun khat tawh kibehlap in lakhiakhawm himai ung” ci-in MNDAA thugenpi in gen hi.
Tuni galphual busimna sungah SAC te’ kiang pan galvan, thauvui thautang tampitak kingahkhia cih zong MNDAA thugenpipa in genbeh hi. Hih SAC galphual 2 akihel SAC galphual kigawm vekpi 164 kilakhia / kisutkhia khinta cih MNDAA pan Chinese pau tawh kisuah Newspaper sungah kiciantak in thusuahna nei uh hi. ” 10127 Operation ” galdona sungah Ta’ang galkap (TNLA) in zong SAC galphual 46 sang tawmzawlo sutkhia khin uh a, khakhat dektak sung galdona ah SAC galphual vekpi gawm 210 kilakhiazo ta cih pulak uh hi.
Hits: 1