October 9, 2023 || Tongsan Media Group ||
Abeisa Nipi kaal sungin Afghanistan gam nitumna lam ah a thahat / akhauh mahmah Zinlingna hangin misi vekpi 2000 valta cih Taliban government in pulakkhia uh hi. Taliban te’n Afghanistan gam a uk khit akipan sumbawl sumzuakna lamah nasiatak a kiatsuk banah tu’n zong a nasia mahmah Zinlinna tuak lailai uh hi.
Tukha October 7, 2023 ni in Herat state sungah khuapi lian 3 na ahi Herat khuapi nitumna lam khuapi Km. 40 a gamlatna mun pansan in 6.3-magnitude thakhauh Zinling in, a si aliam akipan inn leh lo tampi kisiacip hi. Taliban government thugenpi (Spokesman) ahi Zabihullah Mojahid in agenna ah, Zinlinna hangin misi vekpi 2053 leh aliam 1300 val pha ta a, inn leh lo kisia vekpi gawm 1300 val sazian ah kiciamteh thei ta ci-in October 8, 2023 ni-in pulakkhia hi.
Herat khuapi ah a si aliamte zongkhia nasem pawl (Rescues Team)te n phualsat in om ta uh a, annek tuidawn, zatui zaha, nik teen puansilh cihte haksatna tuak mite’ omna mun dongah puak thei ta uh cih thu Zabihullah Mojahid in gen hi. Zinling neuneu om zelzel lai ahih manin, khuamite inn sungah lutngam nailo uh ci hi.
Social Media tungah Zinlinna tawh kisai Photo leh Video te tungtawn in Inn leh lo kisiatnate kimuthei hi. a diakdiak in Herat khuapi kiang Shatt Gus, Baha Dawzai, Zawzai leh Kosh Ket kim teng nasia phadiak ci-in tualsung miten gen hi. Afghanistan gamin hih Zinna hang a siatna a hunhun kithuak zel hi. Abeisa March kha sungin zong Afghanistan nisuahna leitaw lam, Pakistan tawh gamgi lamah Zinlinana hangin mi 13 sang tawzawlo si uh hi.
Abeisa kum June kha sungin zong Afghanistan nisuahna lamah 5.9 Magnitude tha tawh zinlinna hangin Pakistan tawh gamgi Patika leh Khos kim tengah mi 1000 val si-uh hi. Tua banah abeisa 2022 January kha sungin zong 5.6 Magnitude tha tawh zinlinna hangin, Herat State leh Turkmenistan gam tawh kikal ah mi 20 val sikhin uh a, buanman tawh kilam Inn tampi kicimzan hi.
Source: VOA, BBC News
Translated: Tongsan Admin Team
Hits: 3