Shan State (Southern), Pao Autonomous Region, Hsi Hsei khuapi leilu lamah Kikapna omin, SAC galkap misi luang 50 kim tawh Galvan 50 kim kingah khia cih thu Pao National Liberation Army (PNLA) in tangkona nei uh hi.
January 30 ni-in Hsi Hsei khuapi leilu lam mun khatah Pao National Liberation Army (PNLA) leh ukna buluh (SAC) galkapte’ kikal kikapna nasiatak omin, tua kikapna mun etkikna leh velna akineihna pan SAC galkap misi luang 50 kim kimu banah galvan 50 kim zong kingah khia cih kiza hi. SAC leh a khut nuai a om mipi galkap (Militia)te in Pao Region sunga om khuaneute Vanleng pan thaupi tawh nasiatak kapzan gawp cih kiza hi.
Tunitak lam kikapna lah omlo Pao National Liberation Army (PNLA) te zong om loin, Hsi Hsei Township Loitoi khuaneu Pgungzi sanginnte SAC in Vanleng tawh bomb khiat uh a, Pao minamte’ thupitsak mahmahna mun khat ahi Loitoi Phungzi sanginn kisiagawp cih kiza hi.
SAC khut nuai a om mipi galkap (Militia)te in Taunggyi township, Kyauktalone area leh Hopon townshipte ah Pao National Liberation Army (PNLA) te’ min a sialam in zatsim sak uh a, SAC ading galkap lut thakte khem bawlin, kaikhawm cih thu hih mun tengah PNLA in galkap thak kaikhawmlo ahihna thu PNLA Thukizakna lam saiten zaksak uh hi.
Tulaitak lian SAC leh amau khut nuai a om mipi galkap (Militia) te’n, Hsi Hsei khuapi leh Pao Region teng bomb khiatin Thaupi tawh a kapna hangin, mipite Hsi Hsei khuapi sung lutin vante puakhiat loh ding leh mun muanhuaina munah taikhiat ding zaksakna leh thapiakna nei uh hi.
Hits: 1