September 26, 2023 || Tongsan Media Group ||
Sagaing Division, Kalaymyo ah abeisa Kawl tuibuah hun (April) kha 2023 sung a Ukna buluh (SAC)te deihlohna tawh lungphona nei mi 4 te tukha September 24, 2023 ni-in SAC thukhen zumpi pan kum 10 Thongkhiat beh dingin khensatna nei cih thu Kalaymyo lungphona makaite in Tongsan Media ah gen uh hi. Kalaymyo ah Revolution Water Festival lungphona akineihna ah kihel Ko Than Soe Oo, Lia Cing Don Kim, Mah Hnin San leh Ko Myo Ko Winte pen abeisa April 16, 2023 ni-in, SAC te’n amat uh ahi hi. Tua banah Thukhun Upadi No. (505) tawh May 2023 sungin Kum 2 thong kia ding akhensatsa uh ahi hi.
Tun ahih leh ngongtat nasepna Section, No 50 (j), Section 50 (h) leh Section No 50 (a) thukhun tawh kizui-in, thong kum 10 khia beh dinga, akigawm vekpi kum 12 sung Thong khum ding hita hi. Hih pen thuman hetlo thukhenna hi ci-in, Kalaymyo Lungphonna ah kihelden Ko Vaipu in genkhia hi. “Kalaymyp Lungphonate pen a bawlsiat nopna bekbek tawh thumanlo a thong khum behbeh uh hi. Amau (SAC) te akilangpan lohna ding adeihna tawh hih bangin thong kiat hun behlap toto uh hiven“.
SAC in amau alangpang lungphona neite limlim mat ding a sawmna kawm kalah Kalaymyo Lungpho pawlte in SAC te deihloh lungphona pen nisim phialin kinei ahi hi ci-in Kalaymyo lungphona ah kihelte’n gen uh hi. Tulaitak lianin zong Embassador U Kyaw Moe Tun pen UN ah a panmun mah a ngahkik theihna ding deihna tawh lungphona makaite’n makaih in September 21 – 26, 2023 ni dong lungphona kinei tan suak ahi hi.
SAC in ukna a buluh khit akipan Kalaymyo ah SAC deihlohna hang a akaplup uh 30 val leh mat thuak 60 val om ta hi ci-in, Kalaymyo lungphona makaiten genkhia uh hi. Gamvai tawh thongkiate a kem adon pawl ( AAPP) in September 25 ni ciangciang a genna ah SAC in ukna a buluh khit zawh Myanmar gambup ah mipi 19264 val man uh a, tua sung pan 7368 te pen thongkhum uh ci-in genkhia uh hi.
Source: RFA News
Translated: Tongsan Admin Team
Hits: 9