September 26, 2023 || Tongsan Media Group ||
India gam Manipur State government in Myanmar leh India gamgi dungah Km.70 a sau sung khaktan (Sikdailing) khun dingin geelna nei uh cih kiza hi. Manipur State CM N. Biren Singh in India – Myanmar gamgi Km. 70 sau sung khaktan (Sikdailing) kaihna ding geelna ah gamgi lam bawlte (Border Roads Organization -BRO) leh State Ulian thuneite tawh September 24, 2023 ni-in kimukhawm in, kamkupna nei cih thu The Hindustan Times ah genkhia hi.
Tua kimuhkhopna ah gamgi lang tuak a teeng mipite in a gamvengte’ lamah Km. 16 ciang bek suaktatak kikawmthei / pai theih dingin phalna (Free Movement Regime) pen hun ciam omlo a, khakcip dingin Central Government tungah zaksakna a neih khit nikhat khitteh hih bang thukikupna kinei ahi hi. India – Myanmar gamgi dung khaktan (Sikdailing) kaih ding ngimna bulpi pen gamgi kantan a lutsim (Myanmar refugees)te leh vankham khamtheih guihtheih zatuite khaktanna ding cih ngimna hi pen cih thu Manipur State CM in genkhia hi.
” Border Roads Organization – BRO in India kumpi thuneite tawh akimuhna tungtawn in, Km. 70 asau Indo – Myanmar gamgi dung khaktan (Sikdailing) kaih ding vai kikupna om thei ahi hi. General Secretary, DPG leh Home Affair department pan thuneite zong kihel uh hi. A langnih gam tuak pan vankham / sumbawl sumzuakna leh khamtheih zatui guklutnate khang semsem ahih manin, gamgi khaktan ding thupi hi ” ci-in Manipur State CM N. Biren Singh in a genkhiatna thu Indian News ten gen hi.
Manipur State ah tukum May 3 ni akipan minampi Meiteite leh minam tawm Kuku -Zomi kici Singtang mite’ kikal ah minam vai kibuaina a khauhpai laitak ahi hi. Hih kibuaina a hang tuamtuamte lakah Manipur State ah Myanmar gammite phalna omlopi in, a lut sim tamlua ahihna zong hi cih thu India Home Affair Minister leh Manipur State CM te in limgen mahmah uh ci hi.
Hih thu hangin Myanmar tawh gamgi dung tengah khaktanna (Sikdailing) bawlin, Myanmar lam pan phalna omlopi a vankhamte khaktan zawhna dingin Manipur State government in a geel ahi hi. India leh Myanmar gamgi kizopna pen Km. 1600 val sau hi-in, Manipur State tawh kizopna Km. 400 sung sau ci hi.
Source: RFA& Khonumthung
Translated: Tongsan Admin Team
Hits: 6