Karen thautawi (Karen Arm force) tuamtuam teng kipawlkhawmin, KNLA makaihna nuai pan ukna buluh SAC galkapte nasiatak dokhop dingin Karen thautawi kipatzawh kum 75 cinni January 31 ni-in International Karen Organization (IKO) in pulak khia hi. Tu laitak pen Kawlgam minam tuamtuamte’n SAC galkapte a dokhop laitak uh ahih mah bangin, Kawl galkap kumpi-in Mualmite hong khenkhapna hang a, a piangkhia Karen thautawite ahi; Boarder Guard Forces (BGF), Democratic Karen Buddhist Army (DKBA), Karen National Union-Karen National Liberation Army-Peace Council (KNU/KNLA-PC) leh adang Karen thautawite kipawlkhop hun lua ta hi, ci-in zong International Karen Organization (IKO) in genkhia hi.
IKO makaipi Saw Day Lay Htoo in, “SAC galkapte thanem semsem ta ahih manin, Karen thautawi khempeuh KNLA tawh khut kilenin mapang khawm le’ng kithahat semsem ding hihang. Kawlte in Karen-te hong kinetniamna pan suahtakna kingah ta ding hi. Tua bek tham loin, Karen thautawi khempeuh kipawlthei hi leng i tangthu mahmah hong hoih semsem lai ding cih IKO in upna leh lametna lianpi nei hi ung” ci hi.
Kawthooleik Liberation Army (KTLA) leh KNLA zong lawng khatin ging khawm hi leng khaupai zaw in, gualzawhna lianpi kingah ding hi, ci-in IKO makaipi in pulak hi. KNU in gam tuamtuam thukhun tawh kizui-in KNU makaite tungah thuman thutak tawh thu akikhen kei leh amau ki encik dinga, kipawlna ii lim leh vang zong kiam ding hi, ci-in IKO makaipi in genbeh hi.
Tulaitak pen Kawlgam buppi ah SAC galkap phualpite leh amau ukcipna khuapi pawlkhat minam thau tawi kipawlnate (EAOs) leh Mipi galkap (PDFs) in lakhinzo uh a, gualzawhna mualsuak dekdek ta ahih manin, mipi in zong mapan theihna lampi om bangin panpih mahmah ni, ci-in IKO in hanthawn hi. International Karen Organization (IKO) pen Asia, Pacific, Europe le North America a om gam 30 val pan Karen kipawlna tuamtuamte’ kipawlkhopna lianpi khat hi-in, abeisa 2004 September kha sungin a kiphuankhia ahi hi.
Hits: 2