Ukna buluh (SAC) in Myanmar gam thuneihna a sutkhiat ni February 1, 2021 akipan 2024 kum thum sungin Kawlgam buppi huam a om Chin (Zomi) mimal 616 in nuntakna bei lawh khin ta uh hi. Hih SAC in Ukna a buluh kum zawh kum 3 sungah Chin (Zomi) minamte tungah mihing bawlsiatna leh ngongtatna tawh kisai Chin State sungah thukankhia Institute of Chin Affairs (ICA) in amau muhkhiatna leh kankhiatna tungtawn in February ni 1, 2024 ni-in thusuahna a bawlna sungah mimal 618 in nuntak bei lawh uh a, tua sungah Mindat khuapi huam sungah tam pen ci-in pulak uh hi.
Chin State sungah township zui in muhkhiatna ah Mindat township pan 98, Hakha pan 77, Matupi pan 72, Falam pan 69, Thantlang pan 64, Tedim pan 39, Kanpetlet pan 13, Paletwa pan 10 leh Tonzang pan 3, vekpi gawm mihing 445 in nuntak bei lawh uh ci-in pulakna nei hi. Chin State sung ahi lo Sagaing Divion, Magway Division, Yangon Division, Mandalay Division leh mun tuamtuam pan a si mimal kaih khopna pan 173 om ci hi.
SAC te bawlsiatna leh thahna tawh kisai misi sazian kankhiatna-ah vanleng zangin a kapna hangin a si tam pen ci hi. Lei sungah kiphum bomb hang in a si 28, a luang kimu lo 11, zatui zatang kicinlahna hangin a si 22 leh mat leh henna pan thahna thuakin a luang omna kithei nawnlo 10, thonginn (gilbem) pan bawlsiatna thuakin a si 5 leh vanlam zang a kapna hangin a si mimal 84 pha cihte kihel hi.
SAC in ukna a suhkhiat akipan SAC galkap pawl leh mipi kemcing thau tawi pawlte kikal ah kido / kikapna nasia semsem a, tua sungah ukna buluh SAC galkap pawl 200 val sikhin in, mipi kemcing thau tawi lam pan mimal 246 in a nuntakna uh pia khia ci-in ICA in ciamteh hi. Tua banah Chin (Zomi) te teenna inn 2154 SAC pawl in susia / hal tum sakin, biakinn 108 susia / haltum sak khin ci hi. Ukna buluh khit akipan mipite’ nisim nuntakna nek le-dawn vanmante khangin a zah thum pan a zah nga ciang dongah khangto cih thu Institute of Chin Affairs (ICA) in thusuahna nei uh hi.
Hits: 4