October 4, 2023 || Tongsan Media Group ||
Kareenni State ah abeisa September khakhat sung SAC galkapte leh Karenni te kikapna ah SAC galkapte 78 si-in, galvan Thauneu lawng 36, Thaupi lawng 5, thautang nam tuamtuam ngah khia cih thu KNDF ten tuni October 4, 2023 ni-in pulakkhia uh hi. Tua banah SAC galkapte’ Mawtaw 2 haltum sak banah Mawtaw 1 pen Mines tawh kapzan sak banah Galkap 5 hingmat in kemcip uh ci hi.
” Fruso – Bawlakhe kikapna vai bel khawl nailo hiphot! Mipite’ theih huai thupite bek kipulakkhia hiphot hi. Galvai tawh kisai a thupi khat zong suak hi. Tulaitak SAC ii galdona tawh kisai in mainawt sawm leh kikapna piang ding hipahpah hi. Kikapna hun manlang leh a sawt cih tawh kilamdang hiphot ” ci-in KNDF thunei khatin genkhia hi.
September kha Nipi kaalnihna akipan Fruso Township sungah SAC galkapten Fruso – Bolakhe Lamzikpi (Highway) tungah amau galvan pua Mawtaw te suaktatak apai theihna ding Lamzikpi dungah nasiatak hanciam mahmah uh ci hi. Fruso township pansan No. (14) Military Training sang pan Makharoksshi, Lawkyiko, Thale, Paretaw leh Nanphe khuaneu cihte dong SAC galkapten galmai 6 tawh nawk uh cih kizasak hi.
Hih khuaneu 6 tengah phualsat a om SAC galkapte leh Karenni (KNDF) leh akipawlpihte in September kha Nipi kal nihna akipan Khakhat sung vilvel kikap ngekngek uh hi. Kikapna sungah SAC galkapte lam pan a si, aliam tam lua ahih manin, Nanphe, Paretaw, leh Thale khuaneute Galvanleng zangin phial kap uh hi. Tua kikapna sungah KNDF te’n SAC te’ galvan honpi khat lakkhiat sak uh hi.
Fruso Township pansan No, (14) Military Training school ah a kikoihcip SACte’ vanpuakna Mawtaw 60 kimte KNDF leh a pawlte’ kapna hangin, Fruso pan Bolkhe township sungah lutzo nailo hi. Loikaw township sungah zong Shan State pan Loikaw khuapi sungah a lut SACte’ Mawtaw 6 pen KNDF pawlte’n nasiatak kapsak uh hi.
Tua banah Loikaw Towsnhip sung a om SAC galkapte te’ Training sinna Campte zong KNDF kipawl khawmte’n nasiatak do / kap ngekngek uh hi. Demoso Township sung zongah SAC ten kum 2 sung bang aphualsatna ahi; Pupha leh Teesule khua sunga om SAC galkapte pen September Nipi masa sungin KNDF lamte’n nasiatak kap uh a, SAC galkap 20 val si uh cih KNDF ten pulak khia hi.
Tua kikapna ah SAC lamte’n galvanleng tawh ni thum sung nasiatak a kap uh hangin, KNDF lamte’n SACte’ galvan tampi lakhia / ngah khia uh hi. KNDF te’ ukna Mease Township sung Panthein khuaneu a om BGF te’ Cam kim tengah SAC ten phualsat in om uh a, Mease Township sung lakkik zawhna ding, akisap uh galvante a puakkik mengmeng theihna ding ngimna tawh Fruso leh Bolkhe township teng nasiatak a kap ngekngek laitak uh hi cih KNDF ten genkhia hi.
Abeisa September sungin KNDF leh akipawlpih PDFte in SAC tawh 29 vei kikap uh hi. Tua mah bangin SAC ten zong September kha sungin Bolkhe Township sungah vanleng tawh 20 vei kap uh hi. SAC te Vanleng kapna hangin tualsung mi 1 si-in, 7 liam hi. Tua banah SACte’ Landmine hangin tualsung mi 1 in sihlawh hi. Vanleng tawh akapna hangin Mipite’ tenna inn 1, Zato inn 1 leh Christian biakinn 1 kisiazan hi. Thaupi tawh a kapna hangin mipite inn 1 kisiazan hi. Tua banah September khakhat sung kikapna ah KNDF galkapte 8 in sihlawh uh cih kiza hi.
Source: People’s Spring
Translated: Tongsan Admin Team
Hits: 6