Myanmar gam dawn a om Putao District, KIA Brigade (1) Area, Kaunglanphu Township, Kran Hteedam khuaneu a om SAC khutnuai a om Militia Camp khat pen zanni January 6, 2024 zingsang (10:10qm) hunin KIA te’n busim in lei lam galvai saiten gen uh hi. Klaran Hteedam khuaneu a om Miliatia Camp pen abeisa Janaury 2, 2024 ni akipan busim kipan uh hi-in, SAC lam pan Vanleng tawh kap uh ahih manin, zanni January 6, 2024 ni petpet ah lakhiazo uh ahi hi.
” Kikap cilni akipan mahin SAC Camp a ngahkhiat kuan dong Vanleng tawh gal huh uh ahih manin, zanni in a lakhiazo uh suak hi. Langnih tuak a si aliam om tuak uh hi. Hih SAC Camp pen Kaunglanphu Township sungah a thupi leh alianpen Camp khat hi ” ci-in lei lam galvai thuthak saite’n gen uh hi.
Kran Htee Dam khuaneu a om hih Militia Camp a kiphuh zawh kum sawm 20 kim pha khin ta hi a, Putao, Naung Moon leh Kaunglanphu Township cih teng pen Bitna lam (Security) ading a bulpi galmai nawkna Camp lianpi khat zong ahihna thu Putao khuami khatin genkhia hi. Tua Camp kibusimna ah Kachin Independent Army (KIA), PDF Putao leh Khakabo Peoples Defense Force teng kipawlin a dokhawm uh ahi hi.
“Ei mun leh phual ah lungnuam leh daitak ki omm nuam ciat hi. Ko galtaina hang zong abeisa hun lai pek akipan galkidona hangin, inn lam kiciahkik ngam nawnlo in, mundang ah lah omna ding om tuanlo” ci-in KaunglanPhu khuami khatin gen hi. Tua banah Wai Hmaw Township, Tha Lauh khuaneu a om SAC Militia Camp khat pen January 5, ni zingsang (9:00am) hunin kibusim khin cih thu khua sung mite’ tung pan kizasawn hi.
“SAC Militiamen 7 te a mau galvan ciat tawh kihingmat hi. Tua akimante pen galmat thukhun tawh kizui-in, limtak kikoih / kikem “ ci-in thuthak saiten gen hi. Abeisa kum December 15, 2023 ni-in zong Talawgyi leh Bawsade Militia Camp te KIA /KPDF kipawl khawmte in busim in lakhiazo uh hi.
Hits: 0