July 29, 2023 || Tongsan Media Group ||
Tamu township, Khampat khuapi ah phualsat a om Ukna buluh (SAC) galkapte phualsatna leh Police station pen July 22, 2023 nitak lamin mipi galkap (PDF)te’n um cihin va kap uh a, tua ni akipan langnih kikaptuahna nasia semsem ahih manin, ukna buluh (SAC) galkapte limsih mahmah uh a, tua a site luang hawmte July 28, 2023 ni zingsang lamin mei tawh haltum uh cih thu PDF galkapten gen cih kiza hi.
Hih Khampat kikapna tawh kisai pen abeisa July 22,- 28, ni (7) sung vingveng nisim tatsat loin, kikap uh hi a, ukna buluh (SAC)ten lei lam leh vanleng tawh kap uh ahih manin, Khampat mite leh akim apam khuaneu ateng mite inn le lo, vok leh ak, gahingte ek nusiat in, Kawlpi lam leh India gam lamah galtai mang uh a khua sungah kua mah om nawnlo ci hi.
Tua bang a kinusiacip inn leh lo, neihsa ganhingte lunghimawh luatna tawh Khangnote in vaam nuam uh himah leh khua sung lut ngam lo uh ci hi. Khampat khua sung thu pen kiciantak kigenthei hetl hi, ci-in gal taite a vaan khangno khatin Tongsan Media tungah gen hi. “ Amah in a genna ah, “hih bang a galtai dongtuahna khat peuh a om ciangin, thu kigen khat peuh ki-um baih mahmah ahih manin, thu leng sawnte up pahpah loh ding kisam sa mahmah ing. Ko, zong khua sung lut ngam het loin, a khuanawl pan gal-et giaugiau cih himai ung. Tuni bel Khampat khua sung meikhu neinai om in, ahi zongin Innkang dan a mei khu bel hi loin, ukna buluh (SAC) lam pan a site luanghawm akihalna cih mu ung. Ukna buluh (SAC)te bel a galphual (Camp) lam zuan ta uh” ci-in genbeh hi.
Hih vai tawh kisai Online Social media tungah ukna buluh (SAC/MAL) pawlin Khampat khuapi sung innte mei tawh hal cih ciang kigen ngeingai a, ahi zongin Tongsan Media in kancianna le mipite genna tungtawn in inn kihal cih ciang tawh kipsakna kinei bek a, athu kicianin kikansan laitak hi. Khampat kikapna tungtang ah ukna buluh (SAC) lamte bel 10 val si ding cih thu Tamu PDF pan thugenpipa in pulakkhia hi. Ukna buluh (SAC) galkapte in bel Vanleng tawh gal huh ding khiat behbeh hi uh a, ahi zongin PDF galkapte in lam kal pan tatsat loin kap ngekngek uh ahih manin, asi a liam kibehlap den ci hi.
SAC pawlin Khampat khua sungah Thaupi thauneu tawh a phial kapkapna hangin, abeisa July 22 ni zanin Khampat khuapi No. (1) sung ateng khangno (Kum 23) gual khatin sihlawh huai hi. Tua banah July 26 ni-in a galtaina pan inn vil dingin a ciah kik pak khuami khat zong khua lutna kim tengah SAC galkapten kaplum hi. July 28 ni khuamial khit pawlin khua sung pan galtai dingin Motorcylce tawh a pusuak Pastor khat ii tapa unau nih SAC te’n kap ziau uh a, khat si pahin khat liam cih kiza hi.
Reported by: Tongsan Media Reporter, Khampat town
Hits: 9