Shan State, Karenni Nation Progressive Party (KNPP) leh People’s Defense Force (PDF) te’ ngah ding akipuak galvan, Thau leh a vui atang honpi khat pen Ukna buluh (SAC) pawlin mat sak cih thu SAC phualpi in November 17 ni nitak lamin thusuahna nei uh hi. November 16 ni-in Shan State leitaw lam Pinlong (ပင်လုံ) town, Panmoh (ပန်မုန့်) khua huam sung Loitat (လွယ်တပ်) khuaneu a om New Power namgim tui zuakna sai neipa U Khun Tuang Tun pen SAC te in manin thusitna nei uh a, tua tungtawnin Pangmoh khuami Ko Pee Toe kicipa inn huang sung a om Van koihna (Godown) sungah galvan, thauvui thautang lompi man khia ci hi. SAC thugenpi General Zaw Min Tun in akiman galvante pen Special region te’ kiang pan akibawl galvante hi ci-in, gam sung Media-te’ tungah genkhiatna nei hi.
“Kayah State lam akipuak ding galvan leh thauvui thautang tampi tak Pinlong khuapi ah mankhia ung. A huampi’n bel RPG lawng 12, Sen setlet lawng 9, Type 81 rifle lawng 109 leh a vui a tang tampi kihel hi. Type 81 thau namte pen Special region pan kibawl thaunam hi ding ki ummawh hiphot.” Koi pan akibawl khia cih kiciantak akigenkhiat theihloh hangin galvan tawh buaina nung sangah mualtung thautawi pawlte kihel cih SAC thugenpi General Zaw Min Tun in mawh paihna nei hi. Galvan leh thauvui thautang akem leh vaipuak nei teng pen; Khun Taung Tun, Khun Aung Min, Khun Nay Myo, Ko Kyaw Zin Tun, Khun Aung Kyaw Myint, Khun Aung Kyaw leh Ko Pe Toe te kikemcip phot cih thu SAC in pulak hi.
Hih galvante pen KNPP leh PDF pawl kiangah akipuak ding vante hi ci-in SAC in a pulak khiat hangin kipsakna lian om thei nai lo hi. Karenni National Progressive Party (KNPP) lam pan SAC in a mat mite leh vante pulakna tungtawn in KNPP in thuhkikna nei nai lo uh hi. KNPP in Northern Alliance pawl ‘1027 Operation’ thapia in, adang mualtung minam thau tawite lam pan zong hih Operation ah kihel ding hanthotna leh cialna nei hi. Karenni State sungah SAC te langdona leh galsimna min ahi ” 11.11 Operation ” sungah KNPP galkapte leh Karenni Army (KA) zong kihelin mapankhopna nei uh hi.
Hits: 4