Kokang Region, Laukkai Khuapi sung a om SAC galkap leh Khuapi cing (militiamen) galkapte leh Kokang galkap (MNDAA) pawl nasiatak kikap uh a, SAC pawl guallel lua ahih manin a galvante khia in, MNDAA te leh akipawlpihte’n December 24 ni-in Laukkai khuapi buppi phial lakkhia in a ukcip banah Galvan tampi ngah khia uh hi.
” SAC mipi galkap (Militiamen) pawlte ‘n galvan khia uh cih kiza! Police station zong busim in lakhia zo ta ci! Tu’n bel bang mah cian nawnlo himai. Ko, om lai pek akipan Laukkai khuapi sung buppi phial MNDAA pawlin lakhiazo ta ” ci-in Laukkai khuami pasal khatin December 24, ni-in gen hi. Shan State (Northern) ah phualsat Shwephi Media ten zong Laukkai Khuapi a om SAC Militiamen) makai U Pye Shou Chian ii Inn akipan Police station teng MNDAA leh akipawlpihte’n busim in, lakhiazo ta cih thu pulakkhia uh hi.
U Pye Shou Chian pen USD Member of Parliament (MP) lui khat ahih banah abeisa 2016- 2019 sung Lauk Kai khuapi ukpi khat ahi hi. Tua banah U Pye Shou Chain, a tapa neu leh a tanute pen China kumpi in Online tungtawn a sum bawlna tawh mipi khem makaipi (sprawling online gambling gang leader) cih thu tawh mat dingin a koihpa ahi hi.
Lauk Kai khuapi sungah SAC galkapte’ galphualpi (regional command headquarters) khat leh khuapi nisuahna leilu lam China gamgi a om galphual khat bek cian lai bek ci hi. Lauk Kai khuapi lakna tawh kisai akician zaw a theihkhiatna dingin MNDAA Information Department pan thugenpi Li Kya Win tungah thudotna kinei laitak cih kiza hi.
SAC galkap lamte in bel mipite’ lunglut mahmah ahi Lauk Kai khuapi tawh kisai gencianna bang mah nei loin, dai dide phot uh hi. Tukha December 5 ni-in bel Lauk Kai khuapi leitaw lam a om Thayin Mual a SAC galphual pen MNDAA in lakhia uh a, Tungchain veng sung ciang dong galkap koih zihziah banah Laukkai khuapi zong hun ciangtan om loin busim in lakhiazo ding dinmun tungta uh ci hi.
Tua banah SAC in MNDAA akihel ” 1027 Operation” ahi Northern Alliance pawlte tawh abeisa Dece. 7-8 sung holimna nei uh hi. China kumpi ii sapna leh innteek sepna tawh tua holimna pan thukimna lai tungtawn in, SAC galkapte’n Lauk Kai khuapi nusiat dingin kam kivaikhakna nei cih kiza hi. Ahi zongin Laukkai khuapi pan Tai (3 Miles) gamlatna mun China tawh gamgi lutna kongpi (Gate) Yanglong Kyaing (Gate) pan SAC galkapten a galvante khia uh a, December 18 ni sun lamin MNDAA in tua gamgi Gate lakhiazo in ukcip ta uh hi.
Yanlongkyaing Gate akhah suah khit akipan nai kal sung bekin Laukkai khuapi pan SAC galkapte leh Militiamen pawlin Khuapi pua a om MNDAA galkapte kap uh ahih manin, gal kidona kipan hita hi. 1027 Operation galdona akipatkhiat zawh Kokang Region sung a om SAC galkapte galphual vekpi 220 val MNDAA makai in akipawlpihte in lakhia ziahziah uh a, Laukkai khuapi kiang a om Kongchian, Chin Shwe Haw khuapi tawh akigawm khuapi 5 lakhiazo ta uh hi.
Hits: 1