Syria gamah Damascus khuapi kiang a om Irante’ galphualpi khat ah tavuan nei a om Irante’ galkap lamah thudotpi leh a muan mahmah uh General Seyed Razi Mousavi (Iran’s Chief Military Adviser) pen December 25 ni-in, Israel te’n van lam pan kaplup sak uh cih thu Iran leh Syria thuthak saite’n genkhia uh hi. Tua bek tham loin hih General khat akikaplupna hangin Israel te tungah phu ka la ding uh ci-in Iranian kumpi in pulakkhia uh hi.
Hih bangin Israel te in Iran General a thahna pen gal kidona mun hi lo banah Israel te’ gam huam sung zong hilo a, General Razi Mousavi mahmah a ngim / a sawm tektek uh ahih manin, hih bang gamtatna pen leitungbup mihing tawh kisai thukhun palsat (International Human Rights laws) bek tham loin, United Nations Charter sung a omsa Syria gam ii ngongtatna tawh kisai thukhun (An act of encroachment on Syria’s sovereign territory) te dong mindai sak nasepna hi ci-in gen uh hi.
United Nations Charter pen a thupisim / a zahtak gam khempeuh in Israel te’ gamtatna pen mawhsakna leh khaktan ding kisam hi cih thu Iranian Foreign Ministry in gen uh hi. Seyed Razi Mousavi pen Iran galkap thudotpi khat ahih banah Syria leh Hizbolla galkapte’ thudotpi khat zong hi ci-in, Thuthak lamsaite’n gen uh hi. Abeisa in US te’ kaplup ahi General Qassem Soleimani tawh akilawmta khat zong hi cih thu Syria Media ten gen uh hi.
Seyed Razi Mousavi luang hawm pen Teheran khuapi ah December 28 ni-in vuina kinei a, Iranian biakna makaipi Supreme Leader Ali Khamenei leh Iran Military General tampi kihel uh hi. Tua banah hih sihvuina hun ah biakna makaipi Ali Khamini akipan Generalte leh misipa General Razi Mousavi innkuante hehnepna leh thapiakna kinei in, “American leh Israel guallel in simang hen” ci-in mipite awng ziahziah cih thu Iranian Government Media in genkhia hi.
Hits: 3