October 15, 2023 || Tongsan Media Group ||
Lebanon gamah phualsat a om Irante’ panpih den ahi Hezbolla ngongtat te’n Israel galkapte Thaupi (missile) tawh kap thapai uh ahih manin, Israel te’n zong thukkik uh cih thu Israel galkap zumpi (Israeli Ministry of Defense) in october 15, 2023 ni-in tangko khia uh hi.
Lebanon gam sung pan Sik mawtawpi kapkham zo (anti-tank missiles) tang 9 tawh akap banah gamgi a om Camp phual zong Hezbolla galkapten Sikmawtaw kapkham thei Rocket tawh kap uh ci-in, Israel galkap zumpi in gen hi. Tua Hezbolla galkapte’ kapna hangin Israel galkap 1 si ci hi. Israel lamte’n zong thukkik uh a, Lebanon gam sungah Hezbolla te’ munte Thaupi tawh kapkha thei uh cih thu Israel galkap zumpi in gen hi.
Lebanon gamgi dung teng pen galkidona munin ciamteh uh a, gamgi pan Tai (Miles 2) kigamlatna mun ciangciang ah kuamah pailoh dingin Israel galkap zumpi in zaksakna nei hi. Irante a panpih / a gum den hih Hezbolla ngongtat te’n bel Hamas ngongtat te leh Israelte’ kidona paulap in, gal mai thak neihloh dingin, America in khamna leh vau hilhna a neih uh hangin, Lebanon gamgi dinmun pen lauhuai mahmah ta cih thu Israel thukante’n gen khia uh hi.
Abeisa ni 1, 2 sungin Irangamdang vaisaipi (Iran’s foreign minister) pa Lebanon gam hawhin Hezbollah makaite tawh kimuhna nei-in, Israel te’n Gaza khuapi a khakcipna pan a honkikna ding leh Israel in bomb akhiat zom tohtoh lai uh leh galkidona laimai thak tawh kisualtoh dingin zasak uh hi. Tua vauna a neih khit uh ciangin America te’n zong Vanleng pua Tembawpi (USS Dwight D. Eisenhower) makai-in, a nihveina tui lam galdona Tembaw honkhat pen Mediterranean nisuahna lamah pai sak kik uh cih thu kiza hi.
Hits: 6