August 7, 2023 || Tongsan Media Group ||
Shan State leitaw lam a om Leycha Township ah August 6, 2023 ni kikapna ah Ukna buluh (SAC) galkapte a si tampi om cih thu Shan State Progressive Party (SSPP/SSA) in pulakkhia hi. SACte tawh August 6, ni zingsang pan nitak lam ciang dong kikapna sungah SSPP galkap 1 si-in, SAC lamte 10 val si a, a liam sazian kician zo nailo ci-in, genkhia hi.
SAC galkap 2 hingmat in, galkap mawtaw khat mah kingahkhia hi. Langnih kikapna ven khit ciangin SAC ten Pinlong- Leycha- Mainaung leh Leycha Khuapi huam a om Namthein Lei (Namthein Bridge) lutna ah paisak loin khaktan uh ci hi.
Kikapna hangin Leycha Township Haisai khuano uk sung kikapna tawh kinai Naung kyan khuaneu, Nan Pauk khuano,Namloh khuanote pan khuamite Haisai khuano lamah galtai mang uh a, Manlang khua mite Leycha khuapi lamah galtai uh cih kiza hi.
Tua mun tengah gal kikapna nasia mahmah a, kidona om behbeh thei lai dingin SSPP in pulakkhia hi. Tua mun a om SSPP galphual (camp) mun 10 om a, SAC ten a hawl khiat / taikhia sak mang uh hangin, SSPP lamte’n sang nuamlo uh ahih manin, SAC te’n va kap uh a, tua lai pan langnih kikapna piang cih thu SSPP thugenpi Lt. Col. Sai Su in kiciantak genkhia hi.
Source: People’s Spring
Translated: Tongsan Admin Team
Hits: 5