Rakhine State, Minpya khuapi ah gal huh dinga kuan 22nd Division, khut nuai a om Khah Mah Zah (205) Battalion te Rakhine galkap (AA) te’n busim uh a, SAC galkapte tampi si-in, galvan zong a lom atang in ngah khia uh cih thu Rakhine galkap (AA) pawlin TV tawh Online ah khahkhia uh hi.
January 20 ni-in, Minpya khuapi ah galhuh ding a pai SAC galkap 22nd Division nuai a om Khah Mah Zah (205) battalion te pen Rakhine galkap (AA) pawlin nuaimang in zogawp uh a, SAC galkapte misi luang tampi leh galvante uh tampi ngah beh lai ci hi.
Tua banah SAC galkapte in Y8 Vanleng tung pan a khiat uh galvan (equipment )te zong Rakhine galkapte’ khut sung tung sawnsawn lai ci hi. “1027 Operation” galsimna tawh kiton in, Rakhine State ah abeisa November 13, 2023 ni akipan Gal mainawkna khauhpai mahmahna mun ahi Minpya, Kyauk Taw, Myauk Oo, Rathe Taung leh Tumbey khuate ah Rakhine galkap (AA) in thakhat thu in galdona nei uh a, khuapi khempeuh olno takin zogawp in, ukcip khin ta cih thu AA thuthak saite’n gen uh hi.
Hits: 3