Myanmar ukna buluh (SAC) galkapte’ ngongtatna tawh kisai UN Security Council in February 5, 2024 ni-in kong khakcip Meeting nei uh a, tua Meeting thukhensatna pen thupilo / phattuamna bang mah om lo hi ci-in, Myanmar gamvai Ngaihsutpia Kipawlna (Special Advisory Council of Myanmar, SAC-M) in mawhsakna thu pulakkhia uh hi. UN Security Council meeting a neih ma in, UN Security member gam 9 te in thukhensatna uh a pulakkhiatna tungtawn in SAC-M in hih bangin thukimlohna leh mawhsakna nei uh hi.
Special Advisory Council of Myanmar (SAC-M) a phutkhia khat ahi UN ah Myanmar Palailui Ms. Yang Hee Lee in bel Kawlgam ah apiang SAC te’ ngongtatna khempeuh amanlang in a khawlna ding UN Security Council thukhensat No. 2669 pen kilenkiplo, kizanglo hi ci-in genkhia hi. SAC galkapte in pilsinna Sanginn te bomb khiatin, ukna buluh dona (Revolutionary) thapia mipite a hingtang in mei tawh a hallup hun laitak nangawn in, UN Security Council in Kong kikhaknelh Thukikupna nei-in Thusuahkhiatna ta bek nei uh ci-in, a thukimlohna pulak khia hi.
Myanmar gam vai Ngaihsutna pia Kipawlna (Special Advisory Council of Myanmar (SAC-M) a phuankhia khat leh UN Palai Leitungbup huam Myanmar gamvai Suaktatak Thukan Pawl makaipi lui (former chairman of the UN’s Independent International Fact-Finding Mission (FFM), Mr. Marzuki Darusman in zong Myanmar gam vai kigakcipna khauhpai semsem ahih manin, Myanmar gammite in UN Security Council ii huhna leh dalna kisam lua mahmah hi cih thu gen hi. Tua banah UN Security Council ii thukhensatna leh ASEAN gamte’ sepkhiatnate mulmal mel omlo ahihna leh SAC in amau sepkhiatna tungtawn in, ngah ding / thuak dingte a thuak ding uh kisam mahmah ta ci-in genbeh hi.
UN Security Council in Myanmar SAC galkapte pen International Thukhen zum (ICC)ah khiat huai mahmah ahihna sawt lua ta hi. Tua manin UN Security Council in a sep zawh kei leh ICC, ahih kei leh Special Thukhen zum khat peuhpeuh pan thuman thutak tawh thukhen theite in sem thei lua ding hi ci-in the UN’s Independent International Fact-Finding Mission (FFM) ah member lui khat ahi Chris Sidoti in zong genkhia hi.
Myanmar gam vai Ngaihsutna pia Kipawlna (Special Advisory Council of Myanmar (SAC-M) te pen Myanmar gamah galkapten ukna a sutkhiatna tawh kisai langpanna tawh Human Right, Peace, Democracy, Justice and accountability cihte ading nasiatak nasem in ahuh kipawlna khat ahi hi.
Hits: 10