October 27, 2023 || Tongsan Media Group ||
Northern Alliance kici Arakan Army (AA), MNDA, TLNA teng kipawl khawmin Shan state Lashio, Kutkai, Nam Kham, Tha Mo Nye, Lauhkai leh Chin Shwe Haw area kim teng a om Ukna buluh (SAC)te’ galphual teng pen “Operation -1027” cih min tawh October 27,2023 ni zingsang (04:00am) hun pawlin busim uh a, galphual thupi diak mun 6 lakhia zo bek tham loin, SAC galkapte tampi si-in, 3 hingmat uh ci hi. Galvan zong nam tuamtuam alom atang in ngah banah galphual teng haltum pah uh cih kiza hi.
Tua banah Northern Alliance (NA) pawlte in Northern Shan state sung pan SAC galkap kici limlim hawlkhia siang ding, Online pan mi khem / thuman lo sum bawl a semte bei siang sak ding leh SAC galkap thuneihna abei siang dong khawllo in do suaksuak ding cih thute bulphuh in, Thau tawi kipawlna tuamtuamte cialna leh sapna thusuah (Statement) zong bawl uh hi. Tua a Thusuah tangkona tungtawn in Madalay PDFte in kipawlkhawm dingin a thukimna leh a lunglutna thu zaksakna nei pah uh cih kiza hi.
Tulaitak in MNDAA te in Shan State, Chin Shwe Haw khuapi ah phualsat in luah cip uh a, Pyidaungsu leh Asia World lampi dung khempeuh nasiatak khakcip bek tham loin, khualzin gamvak mipite kua mah pai sakloh phot dingin tangkona nei uh hi. Apai veve a om a, banglo khat a tuak leh MNDAA in vaipuak kilalo ding ci-in gencianna leh tangkona uh hi.
Hits: 6