October 18, 2023 || Tongsan Media Group ||
Tulaitak thuthang ahi Palestine leh Israel kikal buaina tawh kisai UN Security Council ah Brazil gam in thusunna nei uh a, US in Veto thuneihna tawh a nialna pen khasiat huai mahmah hi ci-in Russia’s permanent representative Mr. Vasily Nibanya in genkhia hi.
Brazil te’ thusunna ah Palestine te kihemkhia / kituah khiatsakna pen khawlsak ding leh Gaza mun kikhaktannate hepkhiat sak ding leh a kimancip mipite bang mah paulap omlo in, khahkhiat ding cih thu Vasily Nibanya in pulakkhia hi.
Brazil te’ thusunna pen Russia te in thu 2 bawlpha in behlapsak mah leh US ten a khaktan / a nialna hangin UN Security Council ah kipsakna leh khensatna om thei nawnlo ahihna Russia’s Permanent Representative of UN Mr. Vasily Nibanya in gen khia hi.
Israel in Gaza hospital akapzanna ah mihing hehpihna leh khualna ading kikap / kidona thakhat in khawl limlim ding leh gam mipite bomb khiatnate zong lungkimlo in a mawhsakna thu Russia in a behlapna thute Mr. Vasily Nibanya in gen hi. Mihing nuntakna hotkhiatna ding a thusunna pen UN Security Council in kipsakna a neihloh pen sihna leh liamna bainate a tamzaw sem apiansak nopna hang hi ci-in, Mr. Vasily Nibanya in genbeh hi.
Brazil te’ thusunna pen UN Security member gam 15 sung pan gam 12 in thukimpihna nei mah leh US in Veto thuneihna tawh a thalnial ahih manin, kipsakna / khensatna kinei thei lo ahihna Nibanya in gen hi. UN ah USA te’ palai (United States’ permanent representative to the United Nations) in bel tua Brazil te’ thusunna ah Israel te’n kaptheihna khuan aneihna thu hello / lakkhia lo ahihna leh Hamas te’ Ngongtat nasepna zong mawhsakna cihte omlo ahih manin, a nial ka hi uh hi ci-in US ten gen hi.
A lamdanna khatah tua Thusunna pena puahpha a behlap ahi Russia te mahmah in zong Thukimpihna Mee (Vote) khia loin, Britain te tawh kaingawi / laklawh (abstained) in om uh hi ci-in Thuthak kanten pulak uh hi. UN Security Council ah Israelte tawh kisai limlim US in a tawntung in gum leh panpih den uh ahih manin, Palestine – Israel kikal buaina tawh kisai pen UN Security Council ah thukimna leh khensatna cihte baih hetlo ding hi ci-in, leitungbup thuthak saite’n pulak uh hi.
Russia in Ukraine te a busimna zongah UN leh Security Council in bang mahmah a septheih loh bangin, tutung a piang Israel – Hamas galvai zongah bang mah kisemkhia zo tuanlo ding hi ci-in, leitungbup thukan siamte’n muhna nei ciat uh hi.
Hits: 3